တၢ်မၤလိ ၂၅
ဒဲစီဆှံလၢတၢ်ဘူၣ်ထီၣ်ဘါထီၣ်အဂီၢ်
ဖဲစီၤမိၤၡ့အိၣ်လၢ ကစၢၢ်စံၤနါလိၤအခါ ယဟိဝၤယွၤတဲဘၣ်အီၤလၢ ကဘၣ်တ့ထီၣ်ဝဲ ဒဲလီၤဆီတဖျၢၣ်လၢ ကဘၣ်တၢ်ကိးအီၤလၢ ဒဲစီဆှံန့ၣ်လီၤ. ဒဲစီဆှံအံၤကကဲထီၣ်ဝဲ တၢ်လီၢ်လၢပှၤအံၣ်စရ့လးဖိတဖၣ် ကဘူၣ်ထီၣ်ဘါထီၣ်ဝဲ ယဟိဝၤယွၤလီၤ. ဖဲပှၤအံၣ်စရ့လးဖိသုးလီၢ်သုးကျဲအခါန့ၣ် အဝဲသ့ၣ်ကဘၣ်စိာ်ဃုာ်ဝဲဒီးဒဲစီဆှံအံၤလီၤ.
ယဟိဝၤယွၤတဲဘၣ် စီၤမိၤၡ့လၢ– ‘မၢပှၤဂီၢ်မုၢ်တဖၣ် ဟဲဟ့ၣ်လီၤတၢ်လၢ အအိၣ်ဒီးအဝဲသ့ၣ် ဒ်သိးတ့ထီၣ်ဝဲဒဲစီဆှံကန့ၢ်အဂီၢ်.’ ပှၤအံၣ်စရ့လးဖိတဖၣ် ဟဲဟ့ၣ်လီၤဝဲထူ, စ့, တိၢ်ဘီ, လၢၢ်လၢ အလုၢ်ဒိၣ်ပှ့ၤဒိၣ် ဒီးထံဖှံၣ်တဖၣ်လီၤ. အဝဲသ့ၣ်ဟ့ၣ်လီၤစ့ၢ်ကီးဝဲ သိအဆူၣ်, တၢ်ကံးညာ်, ဆၣ်ဖိကီၢ်ဖိအဘ့ၣ် ဒီးတၢ်အဂုၤအဂၤတဖၣ်န့ၣ်လီၤ. ခီဖျိလၢ ပှၤအံၣ်စရ့လးဖိတဖၣ် သးအိၣ်ဟ့ၣ်တၢ်အဃိ စီၤမိၤၡ့ဘၣ်တဲက့ၤ အဝဲသ့ၣ်လၢ– ‘ပတၢ်ဖိတၢ်လံၤအိၣ်အါလံ. တဘၣ်ဟဲစိာ်အါထီၣ်လၢၤတဂ့ၤ.’
ပိာ်မုၣ်ဒီးပိာ်ခွါတဖၣ်လၢ အိၣ်ဒီးတၢ်သ့တၢ်ဘၣ်န့ၣ် ဟဲသူၣ်ထီၣ်စၢၤဝဲ ဒဲစီဆှံလီၤ. ယဟိဝၤယွၤဟ့ၣ်အဝဲသ့ၣ် တၢ်ကူၣ်သ့လၢကတ့ထီၣ်ဝဲဒဲစီဆှံအဂီၢ်လီၤ. အဝဲသ့ၣ်တနီၤန့ၣ် လ့ၢ်လုၣ် ဒီးတနီၤထါတၢ်ကံးညာ် မ့တမ့ၢ် ဆးဃံဆးလၤထီၣ်တၢ်ကံးညာ်လီၤ. ပှၤဂၤတနီၤဂူာ်လၢၢ်, မၤတၢ်လၢထူ မ့တမ့ၢ် မၤတၢ်လၢသ့ၣ်န့ၣ်လီၤ.
ပှၤအံၣ်စရ့လးဖိတဖၣ် တ့ထီၣ်ဝဲဒဲစီဆှံဒ် ယဟိဝၤယွၤတဲဘၣ် အဝဲသ့ၣ်အသိးန့ၣ်လီၤ. အဝဲသ့ၣ်ဆးဝဲယၣ်ဘျးသဒၢ လၢအဃံအလၤတဘ့ၣ်လီၤ. ယၣ်ဘျးသဒၢတဘ့ၣ်အံၤ ဘၣ်တၢ်ဘျးလီၤအီၤလၢ တၢ်လီၢ်စီဆှံဒီး တၢ်လီၢ်စီဆှံကတၢၢ်အဘၢၣ်စၢၤန့ၣ်လီၤ. လၢတၢ်လီၢ်စီဆှံကတၢၢ်န့ၣ် တၢ်အၢၣ်လီၤအီလီၤအတလါ အိၣ်ဝဲလီၤ. တလါအံၤဘၣ်တၢ်တ့အီၤလၢ သ့ၣ်ဖှ့ၡံးတၤဒီးထူလီၤ. လၢတၢ်လီၢ်စီဆှံအပူၤန့ၣ် အိၣ်ဒီးမ့ၣ်အူဒၢမိၢ်ပှၢ်ထူ, စီၢ်နီၤခိၣ်တဖျၢၣ် ဒီးတၢ်ဆိၣ်ကဲၤနၢမူအတၢ်လုၢ်လီၢ်တခါလီၤ. လၢဒဲစီဆှံအဂၢၤန့ၣ် သရာ်တိၢ် ဒီးတၢ်လုၢ်လီၢ်ဖးဒိၣ်တခါ အိၣ်ဝဲလီၤ. တၢ်အၢၣ်လီၤအီလီၤတလါန့ၣ် ဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်လၢ အဝဲသ့ၣ်မၤတၢ်အၢၣ်လီၤလၢ ကဒိကနၣ်ယဟိဝၤယွၤ အကလုၢ်န့ၣ်လီၤ.
ယဟိဝၤယွၤ ဃုထၢထီၣ်စီၤအၤဟရိၣ်ဒီး စီၤအၤဟရိၣ်အဖိခွါတဖၣ်လၢ ကမၤတၢ်လၢဒဲစီဆှံအပူၤ ဒ်ပှၤလုၢ်တၢ်အဒိၣ်တဖၣ်န့ၣ်လီၤ. အဝဲသ့ၣ်မၤတၢ်ဖဲန့ၣ် ဒီးကဘၣ်ဟ့ၣ်လုၢ်ထီၣ်တၢ်လၢ ယဟိဝၤယွၤအအိၣ်လီၤ. ပှၤလၢ အလဲၤနုာ်လီၤလၢ တၢ်လီၢ်စီဆှံကတၢၢ်အပူၤသ့ဝဲန့ၣ် မ့ၢ်ထဲပှၤလုၢ်တၢ်အခိၣ် စီၤအၤဟရိၣ်တဂၤဧိၤလီၤ. စီၤအၤဟရိၣ်လဲၤနုာ်လီၤဝဲလၢ တၢ်လီၢ်စီဆှံကတၢၢ်အပူၤတနံၣ်တဘျီ ဒ်သိးကလုၢ်ထီၣ်တၢ်လၢ အတၢ်ဒဲးဘး, အဟံၣ်ဖိဃီဖိအတၢ်ဒဲးဘး ဒီးလၢပှၤအံၣ်စရ့လးဖိ အတၢ်ဒဲးဘးအဂီၢ်လီၤ.
ပှၤအံၣ်စရ့လးဖိတဖၣ် ဟးထီၣ်လၢကီၢ်အဲၤကူပတူးအပူၤ တနံၣ်ဝံၤအလီၢ်ခံန့ၣ် အဝဲသ့ၣ်တ့ထီၣ်ဝဲဒဲစီဆှံဝံၤဝဲလီၤ. ခဲအံၤ အဝဲသ့ၣ်အိၣ်ဒီးတၢ်လီၢ်လၢ ကဘူၣ်ထီၣ်ဘါထီၣ်ယဟိဝၤယွၤအဂီၢ်လီၤ.
ဒဲစီဆှံန့ၣ် ပှဲၤဝဲဒီးယဟိဝၤယွၤအစိကမီၤ ဒီးယဟိဝၤယွၤမၤဖျါထီၣ် တၢ်အၢၣ်လၢဒဲစီဆှံအဖီခိၣ်လီၤ. ဖဲတၢ်အၢၣ်အိၣ်လၢ ဒဲစီဆှံအဖီခိၣ်န့ၣ် ပှၤအံၣ်စရ့လးဖိတဖၣ် ကဘၣ်အိၣ်ဝဲဖဲန့ၣ်လီၤ. ဘၣ်ဆၣ် ဖဲတၢ်အၢၣ်မ့ၢ်သုးအသးန့ၣ် ပှၤအံၣ်စရ့လးဖိတဖၣ် သ့ၣ်ညါဝဲလၢအဝဲသ့ၣ် ကဘၣ်သုးအလီၢ်လီၤ. အဝဲသ့ၣ်စိာ်ဃုာ်ဒီး ဒဲစီဆှံဒီးပိာ်ထီၣ်ဝဲ တၢ်အၢၣ်အခံန့ၣ်လီၤ.
“ယနၢ်ဟူတၢ်ကလုၢ်သီၣ်ဖးဒိၣ်လၢမူခိၣ်စံးဝဲဒၣ်, ကွၢ်ကွၢ်, ယွၤအဒဲအိၣ်ဒီးပှၤကညီ, ဒီးကစၢ် ကအိၣ်ဝဲဆိးဝဲဒီးအီၤ, ဒီးအဝဲသ့ၣ်ကမ့ၢ်အပှၤဂီၢ်မုၢ်, ဒီးယွၤအကစၢ်ဒၣ်ဝဲ ကအိၣ်ဒီးအီၤ, ဒီးကကဲထီၣ်အကစၢ်လီၤ.”—လီၣ်ဖျါ ၂၁:၃
