Vava Mose kakala kuna Mongo a Sinai, Yave wamvovesa vo katunga e saba. I mûna Aneyisaele badi kunsambidila. Beyantika nata e saba kiaki konso fulu bekwenda.

Yave wavova vo: ‘Zayisa kwa nkangu bavana konso kina balenda mu yikama e salu kia tunga e saba.’ Aneyisaele bavana wolo, palata, nsongo, matadi mantalu ye lunga ya wolo. Bavana mpe nlele mia lino, nkanda mia bulu ye lekwa yankaka. Wau vo nkangu lekwa yayingi batwasanga, Mose wabavovesa vo: ‘Ifwene. Ke nutwasi diaka lekwa ko.’

Akala ye akento ayingi akwa umbangu bavana o moko muna salu kia tunga e saba. Yave wabavana e ngangu kimana basala e salu kiaki. Ankaka basietanga e nsinga, batunganga e nlele yovo viengesa mio. Ankaka bavosonanga matadi, vanga lekwa ya wolo yovo vala e nti.

Aneyisaele batunga e saba nze una Yave kabavovesa. Bavanga nlele miambote wavambulanga e saba mu masuku mole. Dimosi diayikilwanga vo Muvauka, diankaka Mumpungu-vauka. Muna Mumpungu-vauka i mwalundilwanga e nkel’a kangu yavangilwa muna mabaya ye wolo. Muna suku diayikilwanga vo Muvauka i mwakala e tadi kia mini kia wolo, meza ye ziku diayokelwanga e ndumbu yovo lekwa yansunga. Vana yanzala, vakala ye longa diampwena diavangilwa mu nsongo. E nkel’a kangu yasungamesanga Aneyisaele o nsilu basia wa lemvokela Yave. Nga ozeye kana nki i kangu? E kangu i  nsilu besilananga wantu wole yovo ayingi.

Yave wasola Arone yo wan’andi kimana basadilanga muna saba. Bayikilwanga vo anganga. Yau bakala ye kiyekwa kia lunga-lunga e saba yo vana tukau kwa Yave. Arone kaka wa nganga ambuta wakala yo nswa wa kota muna Mumpungu-vauka. Nkumbu mosi kaka muna mvu kakotanga muna suku diadina mu kela yimenga mu kuma kia masumu ma yandi kibeni, ma esi nzo andi ye mu kuma kia masuma ma nkangu awonso a Isaele.

Aneyisaele bafokola tunga e saba una vavioka mvu mosi tuka bavaikila muna Engipito. Owau, bakala ye fulu kina balenda sambidila Yave.

Yave wazadisa e saba kiaki yo nkembo andi. Wavaikisa e tuti dianingamanga vana ntandu a saba. Avo tuti diningamene, Aneyisaele bakwamanananga vana fulu bakala. Kansi avo e tuti ditombokele, bazayanga vo i ntangwa ya yaluka yo kwamanana o nkangalu. Vana vau, bayalulanga e saba yo landa e tuti diadina.