Kema Moisés itstoya ipan tepetl Sinaí, Jehová kiiljuik ma kichijchiua se tabernáculo kampa israeleuanij kiueyichiuaskiaj. Ueliskia kiuikasej nopa tabernáculo kampa inijuantij yaskiaj.

Jehová kiiljuik: “Xikiniljui israeleuanij ma temakakaj ika nochi ininyolo tlen ika kichijchiuasej nopa tabernáculo”. Temakakej oro, plata, piltetsitsij tlen yejyektsitsij uan tlamantli tlen pajpatiyo. Nojkia temakakej borrego ipochkiyo, lino, tlapialmej ininkuetlaxo uan sekinok tlamantli. Tlauel miak tlamantli temakakej, yeka Moisés kiniljuik: “Intemakatokej miak tlamantli. Ayokmo tleno xijualikakaj”.

Miakej tlakamej uan siuamej tlapaleuijkej kema kichijchijkej nopa tabernáculo. Jehová kinmakak tlalnamikilistli, kiampa nopa tekitl tlen kichiuaskiaj kuali kisaskia. Sekij kimalinayayaj ikpatl uan tlajtsomayayaj. Sekinok tekitiyayaj ika oro, ika piltetsitsij uan kichiuayayaj tlamantli ika kuauitl.

Israeleuanij kichijchijkej nopa tabernáculo kej Jehová kiniljuik. Kichijchijkej se yejyektsi cortina tlen ika kitlajkoxelojkej nopa tabernáculo; se cuarto kitokaxtiyayaj Kampa tlatsejtseloltik uan seyok Kampa tlauel tlatsejtseloltik. Kampa tlauel tlatsejtseloltik eltoya nopa kaxa tlen kipixtoya tlajtolsenkaualistli o arca del pacto, tlen kichijchijtoyaj ika oro uan ika kuauitl tlen kiiljuiaj acacia. Kampa tlatsejtseloltik, eltoya se tlauilketsali tlen kichijchijtoyaj ika oro, se mesa uan se tlaixpamitl kampa kitlatiyayaj incienso. Kalmapa eltoya se paila tlen kichijchijtoyaj ika cobre uan se ueyi tlaixpamitl. Kema israeleuanij  kiitayayaj nopa kaxa tlen kipixtoya tlajtolsenkaualistli, kiilnamikiyayaj kiiljuijtoyaj Jehová nochipa kineltokaskiaj. ¿Tijmati tlake eli se tlajtolsenkaualistli? Eli se tlamantli tlen se akajya kitenkaua kichiuas.

Jehová kintlapejpenik Aarón uan ikoneuaj kej sacerdotes. Inijuantij tekitiskiaj ipan tabernáculo; tlamokuitlauiskiaj uan kimakaskiaj Jehová tlakajkaualistli. San nopa sumo sacerdote, Aarón, kinamikiyaya kalakis Kampa tlauel tlatsejtseloltik. Sampatsi ipan se xiuitl kalakiyaya uan temakayaya tlakajkaualistli, kiampa toTeotsij ueliskia kintlapojpoljuis ya, ichampoyouaj uan nochi israeleuanij.

Kema ya panotoya se xiuitl kistejtoyaj Egipto, israeleuanij kitlamichijkej nopa tabernáculo. Nopaya kiueyichiuaskiaj Jehová.

Jehová kinextik tlauel yolpaktoya ika nopa tabernáculo, yeka kitlalik se mixtli ipani. Kema nopa mixtli mokauayaya ipani nopa tabernáculo, israeleuanij amo kana yauiyayaj. Uan tlaj nopa mixtli motlalanayaya, uajka kimatiyayaj monekiyaya kisteuasej. Kisemanayayaj nopa tabernáculo uan kitokilijtiauiyayaj nopa mixtli.