Keman Moisés yetoya itech tepet Sinaí, Jiova kiluij maj kichijchiua se takenkal, tein kitokaytijkej tabernáculo, kampa israelitas ueliskiaj kiueyichiuaskej Dios. Uan no, ueliskia kiuikatinemiskej.

Jiova kiluij Moisés: “Xikinilui israelitas maj kitemakakan tein ueliskej tein ika mochijchiuas tabernáculo”. Israelitas kiuikakej oro, plata, cobre uan tetsitsin tein petanij uan tein patiyoj tein motaliliayaj. No kitemakakej tojmit, lino, ininpaneuayo tapialmej uan miak tamanok. Kitetayokolijkej miak taman, yejua ika Moisés monekik kiniluis: “Ajsiya. Amo teyi xikualkuikanok”.

Miakej takamej uan siuamej akin ueliaj matachijchiuayaj tapaleuijkej maj mochijchiua tabernáculo. Jiova kinmakak tamatilis tein kinpaleuiskia maj kuali kisani tekit. Sekin tajkitiaj, tajtsomayaj oso kichijchiuayaj tajmach. Oksekin tekitiaj ika oro, kitekiaj tet uan ika tachijchiuayaj, oso koujximayaj.

Kichijchiujkej tabernáculo ijkon kemej Jiova kinnauatij. Kichijchiujkej se kualtsin tilmaj tein ika kitajkoxelojkej tabernáculo. Sekopa yetoya Yektik uan oksekopa Okachi Yektik. Kampa Okachi Yektik moajsia arca tein kinelnamiktiaya netenkaualis, tachijchiuj ika acacia kouit uan oro. Kampa Yektik yetoya se tauilketsaloni tachijchiuj ika oro, se mesa uan se altar kampa kichichinoskiaj kopal. Kalixpan yetoya se ueyi komit tachijchiuj ika cobre uan se ueyi altar. Keman israelitas kiitayaj arca, kielnamikiaj ke motenkaujkaj iuan Jiova ke kitakamatiskiaj.

 Jiova kinixpejpenak Aarón uan ikoneuan maj yeskiaj tiopixkamej uan maj tekitinij itech tabernáculo. Monekia kiyekpiaskej uan ompa kimakaskej Jiova nemaktilmej. Sayoj akin kinixyekanaya tiopixkamej, Aarón, uelia kalakia kampa Okachi Yektik. Kalakia sayoj sepa itech xiuit uan kitemakaya se nemaktil tein ika Dios kitapojpoluiskia itajtakoluan yejua, ichankauan uan nochin israelitas.

Israelitas kitamichijchiujkej tabernáculo se xiuit satepan ke kiskej Egipto. Axkan kemaj kipiayaj kani kiueyichiuaskej Jiova.

Jiova kinextij ke kiyolpaktiaya tabernáculo uan kitalij se mixti ikuapan. Komo mixti mokauaya ikuapan, israelitas mokauayaj kampa yetoyaj. Sayoj ke komo mixti moajokuia, kimatiaj ke monekia yaskej okseko. Kikojkopinayaj tabernáculo uan kitojtokayaj mixti.