Sho Moses a li kondundu Sinai, Jehova okwe mu lombwele a tunge etsali lyi ikalekelwa, hali ithanwa etsalihangano, moka Aaisraeli ye na oku mu longela. Oya li haya vulu okuya nalyo kehe mpoka taya yi.

Jehova okwa lombwele Moses a ti: ‘Lombwela aantu ya gandje kehe shoka taya vulu okugandja, shi kwathele mokutunga etsalihangano.’ Aaisraeli oya gandja oshingoli, oshisiliveli, oshikushu, omamanya gondilo nuulyenge. Oya gandja wo oongodhi dhokutungitha, iiyata yoliina, iipa yiimuna niinima yilwe oyindji. Oya li ya gandja iinima oyindji sigo Moses te ya lombwele ta ti: ‘Iinima ya gwana! Inamu eta we.’

Aalumentu naakiintu oyendji ya pyokoka oya li ya kwathele mokutunga etsalihangano. Jehova oye e ya ningi oonkulungu miilonga. Yamwe oya li ya yogoha oongodhi, yamwe oya ningi oondjendjelela nayamwe oya hondjele omathano kiiyata. Yalwe oya li ye shi okuwega nawa omamanya, okulonga iinima moshingoli nenge okuhonga omiti.

Aantu oya tungu etsalihangano naanaa ngaashi Jehova e ya lombwele. Oya ningi oshiyata oshiwanawa shokutopola etsalihangano miitopolwa iyali. Oshitopolwa shimwe oshehala lyUuyapuki, shimwe oshehala lyUuyapukielela. MUuyapukielela omwa li oshikethahangano. Osha li sha ningwa miipilangi yomuthiya nomoshingoli. MUuyapuki omwa li oolamba dhoshihukikwanyeka shoshingoli, oshitaafula noshiyambelo shokufikila iitsinino. Mehale omwa li oshiyaha shoshikushu noshiyambelo oshinene. Oshikethahangano osha li hashi dhimbulukitha Aaisraeli euvaneko  lyawo lyokuvulika kuJehova. Mbela owu shi kutya euvaneko oshike? Olyo okuuvaneka sha momukalo gwi ikalekelwa.

Jehova okwa li a hogolola Aaron noyanamati ya kale taya longo metsalihangano ye li aayambi. Oya li ye na oku li sila oshimpwiyu nokuningila mo Jehova omayambo. Omuyambimukuluntu, Aaron, oye owala a li a pitikwa okuya mUuyapukielela. Okwa li ha ningi eyambo lumwe momumvo omolwoondjo dhe, dhoyana, dhaanegumbo lye nodhoshigwana ashihe shaIsraeli.

Aaisraeli oya mana okutunga etsalihangano muule womumvo gumwe, konima sho ya zi muEgipiti. Ngashingeyi oye na ehala lyokulongelela mo Jehova.

Jehova oku udhitha etsalihangano neadhimo lye, noshikogo osha kala kombanda yalyo. Oshikogo sho sha thikama kombanda yetsalihangano, Aaisraeli oya kala mpoka. Sho oshikogo sha yeluka po, oya dhilutha wo ontanda yawo. Oya yi netsalihangano kehe pamwe ya landula oshikogo.