Me so Moze ba Hili Zinaʼi, iʼandrö khönia Yehowa ba wamazökhi ose, lafotöi ia ose Lowalangi. Tola lafosumange Lowalangi iraono Gizaraʼeli ba nose daʼö. Ose Lowalangi tola laʼohe-ohe misa na latohugö wofanö.

Imane Yehowa, ’Andrö ba ndraono Gizaraʼeli enaʼö labeʼe ngawalö niʼogunaʼö ba wamazökhi ose Lowalangi.’ Labeʼe ganaʼara iraono Gizaraʼeli, firö, tembaga, kara sebua böli, gama-gama, bana wol, linen, uli gurifö ba tanö böʼönia. Oya sibai dolo-tolo nibeʼera irege iwaʼö khöra Moze, ’Tobönö daʼö! Böi miʼohe saʼae.’

Ato ndra matua hegöi ira alawe sogonekhe, fao ira ba wamazökhi ose Lowalangi andrö. Yehowa zangatua-tuaʼö yaʼira. So zamazökhi bana faoma nukha, manuzi, mamaʼanö kara, mamazökhi gama-gama moroi ba ganaʼa, mazui mamahö eu.

Lafazökhi nose Lowalangi simane sibai niʼandrö Yehowa khöra. Lahaogö mbaʼa-baʼa si sökhi enaʼö tebagi dua nose Lowalangi andrö, si oföna Nahia Niʼamoniʼö, aefa daʼö Nahia Wondrege Niʼamoniʼö. Ba Nahia Wondrege Niʼamoniʼö so dawöla amabuʼula nifazökhi moroi ba geu akasia ba anaʼa. Ba Nahia Niʼamoniʼö so nahia wanunu sumange somuhua, naha wandru moroi ba ganaʼa aefa daʼö meza. Tanö bakhania, so mbaʼa nidanö moroi ba tembaga ba naha wameʼe sumange sebua. Tawöla amabuʼula zamasugi ba dödö ndraono  Gizaraʼeli wa no fazazi ira khö Yehowa ba woloʼö niwaʼönia.

Ifili Yehowa zi tobali ere khönia ba nose Lowalangi yaʼia daʼö Aʼaroni ba ononia matua. Enaʼö larorogö nose Lowalangi ba labeʼe zumange khö Yehowa. Ha Aʼaroni zi tola möi bakha ba Nahia Wondrege Niʼamoniʼö börö me ere sebua ia. Möi ia bakha ba daʼö sakali döfi ba wameʼe sumange enaʼö tola teʼefaʼö horönia, horö nösi nomonia, hegöi horö ndraono Gizaraʼeli.

Döfi me no laröi danö Miserai, awena awai lafazökhi nose Lowalangi iraono Gizaraʼeli. Iadaʼa, so saʼae khöra nahia wamosumange Yehowa.

Omuso sibai dödö Yehowa ba nose Lowalangi andrö irege ibeʼe lawuo yawa ba detenia. Na so lawuo andrö ba dete nose Lowalangi, eluahania böi lafawuʼa nosera iraono Gizaraʼeli. Hizaʼi, na muzawa lawuo andrö ba dete nose Lowalangi, eluahania moguna latohugö wofanö. Lafuli labokai nose Lowalangi ba laʼoʼö wofanö lawuo andrö.