Puetyi Moisesi ekahi Komphunda Sinai, Jeova emupopila atunge ekaka opo ova Isilayeli vafendele-mo Huku. Ankho lina okutungwa monkhalelo yapepuka okulitungulula nokulityinda.

Jeova apopi okuti: ‘Popila ovanthu vaave etyi vena opo vatunge ekaka liefendelo.’ Ova Isilayeli avaave opalata, noolu, nomamanya omawa, novinyanga, no noseta mbovinyama novipuka ovikuavo. Vaava ovipuka ovinyingi, Moisesi evepopila okuti: ‘Pahe tyapwa! Muhaetei vali natyike.’

Ovalume ovanyingi novakai ovanongo avakuatesako okutunga ekaka liefendelo. Jeova weveavela ounongo wokulinga ovipuka. Vamwe avapangiya ovipuka nokunyika. Vakuavo valinga ovipuka vimwe nomamanya akolela, noolu, nomiti.

Ovanthu avatungu ekaka liefendelo ngetyi Jeova evepopila. Vatunga ekaka limwe ewa, mokati avapake-mo otyinyanga tyiteta Omphangu Ikola nepata. Velitunga nomuti utiwa akasia noolu. Pepata ankho pakala ovikandiyelo, nomesa nomutala. Momphangu Ikola mukala otyikasa tyalingwa nomuti utiwa akasia noolu. Otyikasa otyo ankho tyiihanwa okuti otyikasa tyomphango, ankho tyihinangelesa ova Isilayeli omulao valinga wokutavela ku Jeova. Ove wii omulao patyi valinga? Omulao umwe welikalela.

 Jeova aholovona Arau novana vae vakale ovanakwa opo vaundape mekaka liefendelo. Ankho vena okuyunga ekaka liefendelo nokulinga oviawa pala Jeova. Arau ankho omunene-kwa tupu oe vala waholovonwa opo anyingile Momphangu Ikola. Ankho unyingila-mo like menima opo alinge ovilikutila, opo aevelwe ononkhali mbae, no mbo mbombunga yae, no mbelongo aliho lio Isilayeli.

Ova Isilayeli vamanuhula okutunga ekaka liefendelo etyi palamba enima tunde etyi vatunda mo Egitu. Pahe ankho vena omphangu yokufendela Jeova.

Jeova waeta ekaka liombila kombanda yekaka liefendelo pala okulekesa omunkhima wae. Tyina ekaka liombila litalama ova Isilayeli vatula. Tyina lienda nopeulu ova Isilayeli ankho vetyii okuti omuvo wehikapo wokutualako noungendi. Avatungulula ekaka liefendelo avalandula ekaka liombila.