Jehová Diosqa Sinaí orqopi Moisesman kamacherqa Diosta yupaychanapaj toldota ruwananta. Chaypi israelitas Diosta yupaychanankupaj. Chay toldotataj maymanpis apayta atillaj kanku.

Jehová Dios Moisesman nerqa: “Niy israelitasman yupaychana toldota ruwanapaj munasqankuman jina qonankuta”, nispa. Israelitastaj mana michʼakuspa qorqanku qʼaytuta, linota, qarasta, qorita, qolqeta, cobreta, valorniyoj rumista, waj valorniyoj imastawan. Chayrayku Moisés nerqa: “Cabalña, amaña apamuychejchu”, nispa.

Ashkha qharis, warmis ima yupaychana toldota ruwaysikunankupaj phushkarqanku, awarqanku chayri bordarqanku. Wakintaj qoriwan llankʼarqanku, valorniyoj rumista kʼutorqanku, maderasta lluskʼacharqanku. Diostaj paykunaman yachayta qorqa.

Israelitasqa chay toldota Diospa nisqanman jina ruwarqanku. Chay toldopi Santo Lugarta, Aswan Santo Lugarmanta tʼaqanankupaj uj kʼachitu cortinata ruwarqanku. Aswan Santo Lugarpeqa Diospa trato ruwasqan arca kasharqa, chaytaj acacia maderamanta, qorimantawan ruwasqa karqa. Santo Lugarpitaj qorimanta candelabro, uj mesa, inciensota qʼosñichinapaj altar ima kasharqa. Patiopitaj broncemanta chʼillami, jatun altar ima kasharqa. Diospa trato ruwasqan arcaqa, israelitasta yuyarichej “Diosta kasukusaj” nisqankuta. ¿Imataj uj trato? Uj tratotaqa iskay chayri astawan runas ruwanku, nisqankuta juntʼanankupaj.

 Jehová Diosqa Aaronta, wawasnintawan toldonpi sacerdotes jina trabajanankupaj churarqa. Paykunaqa Diosman ofrendasta jaywananku karqa, toldotataj cuidananku karqa. Kuraj kaj sacerdote Aaronlla, Aswan Santo Lugarman yaykuyta atej. Payqa watapi uj kutita yawar aparisqa yaykoj. Chay yawartataj payrayku, familianrayku, llajtaj juchasninrayku ima jaywaj.

Israelitasqa Egiptomanta llojsimusqankumanta watanpaj Diosta yupaychana toldota ruwayta tukorqanku. Chaypitaj Jehová Diosta yupaycharqanku.

Jehová Diosqa chay toldo patapi chhoqo phuyuta rikhuricherqa, chay toldowan kusisqa kashasqantataj rikucherqa. Chay phuyu mana oqharikojtenqa, israelitasqa chayllapi qhepakoj kanku. Oqharikojtintaj maymanchus phuyu rej chayman rej kanku. Diosta yupaychana toldotapis apakapoj kanku.