Are chiʼ Moisés kʼo pa ri juyubʼ Sinaí, Jehová xubʼij che kubʼan jun tabernáculo. Ri tabernáculo are jun alaj ja nim ubʼanik, chilaʼ ri israelitas kekunik kkiqʼijilaj wi ri Dios. Xuqujeʼ, kekunik kkikʼam bʼi ri tabernáculo jachiʼ ri kebʼe wi.

Jehová xubʼij: «Chataʼ che ri tinamit che kkiya ri kekunik rech ketobʼan che ubʼanik ri tabernáculo». Ri israelitas xkikʼam bʼi qʼan pwaq, saq pwaq, qʼan chʼichʼ, jeʼlalaj taq abʼaj xuqujeʼ joyas. Xuqujeʼ xkiya lana, lino, kitzʼumal awaj rukʼ nikʼaj chik jastaq. Sibʼalaj xesipanik, xkisipaj kʼi jastaq, rumal laʼ Moisés xubʼij chke: «Sibʼalaj kʼi chik. Rajawaxik ta chik che kikʼam lo más».

E kʼi ajchakibʼ achijabʼ ixoqibʼ xetobʼan che ubʼanik ri tabernáculo. Jehová xuya kinoʼj rech utz xel ri chak. Jujun chke xebʼatzʼanik, xekemanik o xetʼisomanik. Nikʼaj chik xechakun rukʼ ri qʼan pwaq, xkisukʼumaj xuqujeʼ xkikoj ri e abʼaj, o kkibʼan tzʼalam.

Ri tinamit xubʼan ri tabernáculo junam rukʼ ri xubʼij ri Jehová che. Xkibʼan jun jeʼlalaj cortina rech kutas ri kebʼ upam ri ja: ri Santo rukʼ ri Santísimo. Pa ri Santísimo kʼo ri Arca re ri pacto bʼanom che cheʼ re acacia xuqujeʼ qʼan pwaq. Pa ri Santo kʼo jun candelabro re qʼan pwaq, jun mesa xuqujeʼ jun altar che kporox wi incienso. Chuwach ri ja kʼo jun pilaʼ o tzima re cobre, xuqujeʼ jun nimalaj altar. Are chiʼ ri israelitas kkil ri Arca re ri pacto, knaʼtaj chke che xkitzujuj unimaxik ri Jehová.  ¿La awetaʼm jas riʼ jun pacto? Are jun tzujunik nim ubʼanik.

Jehová xuchaʼ Aarón rukʼ ri e ralkʼwal rech keʼux kojol tabʼal toqʼobʼ che kechakun pa ri tabernáculo. Rajawaxik che kkichajij xuqujeʼ kkiya sipanik che ri Jehová chilaʼ. Xaq xiw ri kinimal ri e kojol tabʼal toqʼobʼ, Aarón, kyaʼ che kok pa ri Santísimo. Jumul pa jun junabʼ kok chilaʼ rech kuya tabʼal toqʼobʼ pa uwiʼ ri umak, ri kimak ri ufamilia xuqujeʼ ri umak ronojel ri tinamit Israel.

Ri israelitas xkikʼis ubʼanik ri tabernáculo are chiʼ elenaq chi lo jun junabʼ pa Egipto. Kimik kʼo chi jun lugar rech keqʼijilan che ri Jehová.

Jehová xuya jun sutzʼ pa uwiʼ ri tabernáculo xuqujeʼ xunojisaj che ri ujuluwem. Rukʼ waʼ, xukʼutu che sibʼalaj kkikotik. We ri sutzʼ kkanaj kan pa uwiʼ ri tabernáculo, ri israelitas kekanaj kan jachiʼ e kʼo wi. Are kʼu we ri sutzʼ kwalijik, ketaʼm che kebʼe chi pa jun lugar. Kkikʼam bʼi ri tabernáculo rech kkiterenej ri sutzʼ.