Sinai urqupim Moisesta Jehova Dios kamachirqa carpata ruwananpaq. Chay carpaqa karqa Jehova Diosta yupaychanapaq suma-sumaqmi, maymanpas mana sasachakuspalla apana.

Chay carpata ruwanankupaqmi Moisesta Dios nirqa: “Imallankuwanpas Israel runakuna yanapakuchunku”, nispa. Chaymi qurqaku: Qullqita, qurita, alhaja rumikunata, millwata hinaspa animalpa qarantapas. Tukuy imata qusqankuraykum Moisesqa nirqa: “Chayllapaqñam, amaña apamuychikchu”, nispa.

Chay carpa ruwaypiqa qaripas warmipas yanapakurqakum. Jehova Diosmi yachayta qurqa allinta ruwanankupaq. Wakinkum puchkarqaku, awarqaku hinaspa bordarqaku, wakinkuñataqmi qurita chulluchiqku, qiruta llaqllaqku hinaspa alhaja rumikunawan laqaqku.

Chaynapim Jehova Diospa munasqanman hina chay carpata qispirachirqaku, hinaspam sumaq rakta telawan iskay cuartoman rakinarurqaku. Patiomanta yaykuykunallapim karqa “chuya” cuarto nisqanku, chaypim karqa mesa hinaspa achki ratachina, karqataqmi inciensota kañana altarpas. Uku cuartotañataqmi “chuyay-chuyay” nispa nirqaku, chay cuartopim quriwan llusisqa acuerdo ruwana baul karqa, chay baulmi Israel runakunata yuyarichirqa tukuy imapi Jehova Diosta kasukunankupaq acuerdo ruwasqankuta. Patiopiñataqmi karqa lavatorio hinaspa hatun altarpas.

 Chay carpapi sacerdotekuna kanankupaqmi Jehova Diosqa Aarontawan churinkunata akllarqa, chaypi llamkanankupaq hinaspa animalkunatapas kañanankupaq. Chaymantapas chay “chuyay-chuyay” cuartomanqa sacerdotekunapa jefen Aaronllam watapi huk kutillata yaykuq kikinpa huchanmanta, ayllunpa huchanmanta chaynataq Israel runakunapa huchanmanta Diospaq kañapunanpaq.

Egiptomanta lluqsimusqanku qatiqnin watallanmanmi Diospa carpan ruwayta tukururqaku. Chay carpapiñam Diosta yupaycharqaku.

Munasqanman hina carpan qispiruptinmi Diosqa carpanpa hawanpi puyuta rikurirachirqa. Chay puyu hinallapi sayaruptinqa Israel runakunam hinallapi samananku karqa. Puyu huqarikuptinqa yacharqakuñam huk lawmanña rinankupaq, chaymi carpata paskaruspanku puyuta qatirqaku.