Sinaí orqopi Moisés kashaqtinmi Diosqa kamachiran juj karpata ruwanankupaq. Chay karpapin Israel runakunaqa Jehová Diosta adorananku karan. Jinaspapas chaytaqa atirankun maymanpas apayta.

Jehová Diosmi niran: “Runakunata niy karpata ruwanapaq imachus necesitakusqanta atisqankuman jina apamunankupaq”, nispa. Jinan Israel runakunaqa apamuranku qorita, qolqeta, sumaq rumikunata, alajakunata, q’aytuta, linota, animalkunaq qaranta, jujkunatawan. Qoykukuq kasqankuraykun imaymanata apamuranku, chaymi Moisesqa llaqtata niran: “Askhañan kashan, amaña apamuychischu”, nispa.

Askha qharikuna, warmikuna iman yanapakuranku karpa ruwayta. Jehová Diosmi yachayta qoran allinta ruwanankupaq. Wakinmi puskaranku, tejeranku otaq bordaranku. Jujkunataq qoriwan llank’aranku, rumita parteranku otaq k’ullukunata llaqllaranku.

Jehová Diospa kamachisqanman jinan adorana karpata ruwaranku. Juj sumaq cortina ruwasqankuwanmi t’aqaranku ch’uya cuartota ch’uyay-ch’uya cuartomanta. Ch’uyay-ch’uya cuartopin tarikuran rimanakuy arca, chayqa maderamanta ruwasqa qoriwan llut’asqa karan. Ch’uya cuartopitaq tarikuran qorimanta candelabro, juj mesa, inciensota ruphachinapaq altarpas. Patiopin tarikuran jatun p’uku, jatun altarpas. Rimanakuy arcata rikuspan yuyariranku Diosta kasukunankupaq prometekusqankuta.  ¿Imataq juj rimanakuyri? Chayqa juj promesata ruwaymi.

Jehová Diosmi Aaronta wawankunatawan ajllaran sacerdote kanankupaq, adorana karpapi llank’anankupaqpas. Chay karpata cuidaspan Diosman ofrendakunata jaywananku karan. Uma sacerdote Aaronllan ch’uyay-ch’uya cuartomanqa jaykuran. Watapi juj kutillatan jaykuran juchanmanta, familianpa juchanmanta, llaqtaq juchanmantawan sacrificiota jaywananpaq.

Egiptomanta juj wata lloqsimusqanku qhepamanmi adorana karpata ruwayta tukuranku. Chayraqmi paykunaqa juj lugarpi Jehová Dios adorayta atiranku.

Jehová Diosmi karpaq patanpi phuyuta tiyaykachiran, jinaspa k’anchayninta k’anchaykuran. Chaywanmi rikuchiran kusisqa kasqanta. Phuyu altoman oqarikuqtinmi Israel runakunaqa yacharanku puririnanku kasqanta, jinaspa karpata paskaspa phuyuta qatikuranku. Phuyu tiyaykuqtintaq paykunaqa yacharanku chay lugarpi qhepakunanku kasqanta.