Sinaí urcupi cajpimi Jehová Diosca Moisestaca shuj tabernáculo nishcata rurachun mandarca. Chai tabernáculo nishca carpa huasica caishuj carpacunamanda ashtahuan alimi cana carca. Chaipimi israelitacunaca Jehová Diosta adorai ushana carca. Chai carpa huasitaca maiman rishpapash apai ushanallami carca.

Jehová Diosca Moisestaca nircami: Tabernáculo nishcata rurangapaca israelitacunata imagutapash caramuchun mañangui nishpa. Chaimi israelitacunaca “orota, culquita, cobreta”, juyailla rumicunata, zarcillocunata, cadenacunata, pulseracunatapash curca. Shinallata lino puchata, llama milmata, animalpa caracunata, shuj cosascunatapashmi apamunajurca. Israelitacunaca tucui shunguhuanmi ashtaca cosascunata apamunajurca. Chaimandami Moisesca nirca ama ashtahuan apamuichichu nishpa.

Imacunatapash alipacha ruraj ashtaca jaricuna, huarmicunami tabernáculo nishcata rurashpa ayudarca. Paicunataca Jehová Diosllatami alipacha yachajushcacuna cachun ayudarca. Huaquingunaca puchata rurashpa, telacunata rurashpa, bordashpa, shujcunaca orota, rumita, caspicunata juyaillaguta rurashpami trabajan carca.

Tabernáculo nishcataca Jehová Dios mandashca shinami israelitacunaca rurarca. Tabernáculo nishcapica ishcai ucucunami tiarca. Chai ucucunata separangapaca shuj juyailla cortina telatami churarca: Chai ucucunaca Santo y Santísimo nishcacunami carca. Santísimo nishca ucupica acacia caspihuan, orohuan rurashca cajami tiajurca. Chai cajatami Arca del pacto nin carca. Cutin Santo nishca ucupica ‘orohuan rurashca candelero, shuj mesa, inciensota cushnichina altarpashmi’ tiajurca. Patiopica cobrehuan rurashca shuj paila o palangana nishcami tiarca. Shinallata Diosman animalcunata cushpa rupachina altarpashmi tiarca.  Israelitacuna arca del pacto nishcata ricushpaca Jehová Diostalla cazushun nishcatami yarin carca. ¿Shuj pacto ima cashcata yachapanguichu? Shuj pactoca imatapash ari nishcata pactachinami can.

Jehová Diosca, Aarondapash paipa churicunatapash tabernáculo nishcapi sacerdotecuna cachunmi agllarca. Paicunaca tabernáculo nishcata cuidashpa, chaipimi Jehovaman sacrificiocunatapash rurana carca. Shinapash Santísimo nishcamanga Aaronllami sumo sacerdote caimanda yaicui ushana carca. Aaronga paipa juchacunamanda, paipa familiapa juchacunamanda, tucui israelitacunapa juchacunamanda Jehovaman shuj sacrificiota rurangapami huatapi shuj viajella chaimanga yaicun carca.

Egipto llactamanda llujshishca shuj huata jipami israelitacunaca tabernáculo nishcata rurai tucuchirca. Shinami israelitacunaca Jehovata adorana pushtuguta ña charirca.

Chai jipami, tabernáculo nishca ‘carpataca fuyu quilparca. Mandaj Diospa punchapambapashmi carpapica jundarca’. Shina rurashpami Jehová Diosca cushilla cashcata ricuchirca. ‘Fuyu na vichai jatarijpica’ israelitacunaca na maimanbash rinachu carca. Shinapash fuyu vichai jatarijpica israelitacunaca tabernáculo nishcata alzashpami fuyuta catishpa rina carca.