Кала о Моисеё сас по плай Синай, о Иегова ԥэндя, со тэ терэл. Во трэбуй сас тэ стерэл и бари катуна, кай израильтяноря тэ тэлён лэ Дэвлэсти. Кала вонэ пэрэжанас еқэ ҭанэстар пэ авэр ҭан, вонэ трэбуй сас тэ лэн ла пэса.

О Иегова ԥэндя лэ Моисеёсти: «Мэк кажно анэн, со может, кай тэ стерас и бари катуна». И мануша андэ́ сомнак, руп, ха́ркум, кучутнэ бара и украшения. Кадяжэ вонэ андэ пушом, материя анда лёно, животнонэндирэ мурца и бут со инке. И мануша кадя бут вся анэнас, кай лэ Моисеёсти прижыляпэ тэ ԥэнэн: «Будэр нисо на трэбуй тэ анэн. Акана амэндэ исин вся».

И бари катуна стидэнас мурша и жувля, савэ ӷанэнас када тэ терэн. О Иегова стердя, кай вонэ май драго тэ полэн, сар тэ терэн кадэя бути. Варико терэлас ҭава, материя и висувавэлас пэр лэндэ. Дэко терэнас бути кучутнэ барэнца, сомнакаса, ай варико вишынэнас анда каш.

И мануша стердэ и бари катуна кадя, сар ԥэндя о Иегова. Вонэ стердэ шукарни бари колиба, кай тэ розделин и катуна пэ дуй рига. Ек риг, пэ сави ԥэнэнас свынто, ай пэ авэр риг, сас свынто май анда свынти. Андэ риг, пэ сави ԥэнэн свынто май анда свынти, тердёлас о ящико. Андэ кадэва ящико сас о доӷоворо. Во трэбуй сас, кай израильтяноря тэ сэрэн, кай вонэ динэ алав лэ Иеговасти тэ кандэн лэс. О ящико сас стердо анда витка акация и обтердо сомнакаса. Котэ, кай сас свынто, тердёлас сомнаконо светильнико, столо и жертвеннико, пэ саво ԥабарэнас о фимиамо,  саво драго қандэлас. Андэ града тердёлас баро харкумуно чаро и фартэ баро жертвеннико. Ай ӷанэс, со када доӷоворо? Доӷоворо, када, кала дэн особо алав, кай терэна кода, со ԥэндэ.

О Иегова стодя лэ Ааронос и лэстирэ шавэн рашанца, кай вонэ тэ служин андэ бари свынто катуна. Вонэ трэбуй сас тэ диқэн пала кадэя катуна и тэ анэн котэ жертвы лэ Иеговасти. Кати о Аароно зажалас интя, кай сас свынто май анда свынти, важ кода кай во сас само баро рашай. Во зажалас кордэ еқвар андо бэрш и ԥабарэлас и жертва пала пэско бэзэх, лэ ереско и лэ народоско.

Израильтяноря достидэ и бари катуна через бэршэстэ, сар вижылэ анда Египто. Акана лэндэ сас ҭан, кай тэ тэлён лэ Иеговасти.

Лэ Иеговасти фартэ чалеля и бари катуна. Кай тэ сыкавэл када, понад кадэя катуна стидяпэ туча. Израильтяноря ӷанэнас, кай сар исин туча, тоди лэнди никаринг на трэбуй тэ тидэнпэ. Но сар и туча ваздэласпэ, вонэ полэнас, кай трэбуй тэ жан андо дром. Вонэ розлэнас и бари катуна и жанас пала туча.