Pikhali Mose pa Phiri ya Sinai, Yahova ampanga toera kumanga nsasa wakupambulika ukhacemerwa tabhernakulu, wakuti mbudaphatisirwa na Aisraeli toera kulambira Yahova. Iwo mbudakhala wakukhonda nentsa kuufunya na kuuthuka toera kuenda nawo ku mbuto inango.

Yahova alonga: ‘Panga Aisraeli toera apereke pinakwanisa iwo toera kuphedzera kumangwa kwa tabhernakulu.’ Aisraeli apereka ouro, parata, cobre peno nkuwa, miyala yakufunika kakamwe na pinthu pinango. Iwo aperekambo maweya a pinyama, usalu wa linho na pinango. Iwo apasa mwakudzala manja mpaka Mose kulonga: ‘Pyakwana. Lekani kubweresa pinango.’

Yahova apasa amuna na akazi azinji maluso toera aphedzere kumanga tabhernakulu. Iwo akhasona nguwo na usalu mbazisasanyira. Anango akhasasanya pinthu pya miyala, pya ouro peno pya matabwa.

Mbumba yamanga tabher- nakulu ninga mudaapanga Yahova. Iwo acita nguwo yakubalika toera kugawa tabhernakulu m’makhundu mawiri: Mbuto Yakucena na mbuto Yakucena Kakamwe. M’mbuto Yakucena Kakamwe mukhali na bokosi ya cibverano yakucitwa na matabwa a nkexa na ouro. M’mbuto Yakucena mukhali na cakuikhira nyale ca ouro, meza, na guwa yakupisira ntsembe. Pa mbuto yakunja kwa nsasa kukhali na basiya ya parata na guwa ikulu. Bokosi ya cibverano ikhakumbusa Aisraeli pya pikiro yawo toera  kubvera Yahova. Usadziwa kuti cibverano ninji? Ndi pikiro yakupambulika.

Yahova asankhula Aroni na anace toera kuphata basa mu tabhernakulu ninga anyantsembe. Iwo akhafunika kutsalakana tabhernakulu na kupereka ntsembe kuna Yahova. Basi ene Aroni, nyantsembe wankulu, ndiye akhatawiriswa toera kupita m’mbuto Yakucena Kakamwe. Iye akhacita pyenepi pacaka toera kupereka ntsembe thangwi ya madawo ace, a banjace na a mbumba yonsene.

Aisraeli amala kumanga tabhernakulu caka cibodzi pakumala kubuluka ku Ejito. Natenepa, iwo adzakhala na mbuto toera kulambira Yahova.

Yahova adzadza tabhernakulu na mbiri yace, pontho padzulu pace pakhaoneka khole. Mu ndzidzi ukhali khole padzulu pa tabhernakulu, Aisraeli akhapitiriza pa mbuto ibodzi ene. Mbwenye khole ingabuluka, iwo akhadziwa kuti ukhali ndzidzi toera kubuluka. Iwo mbadafunya tabhernakulu mbatowera kunaenda khole.