A o iai Mose i le mauga o Sinai, na faatonuina ai o ia e Ieova ina ia fausia se faleʻie faapitoa e taʻua o le faleʻie paia, ina ia mafai ai e tagata Isaraelu ona tapuaʻi atu iā te Ia. Sa mafai ona latou aveina le faleʻie paia, a o latou faimalaga solo.

Na faapea atu Ieova: ʻIa e fai atu i tagata e foaʻi mea e mafai ona latou foaʻi, ina ia fesoasoani ai i le fausiaina o le faleʻie paia.’ Na foaʻi e tagata Isaraelu auro, siliva, ʻapamemea, maa tāua ma mea e fai ai teuga. Na latou foaʻi foʻi fulufulu mamoe, ʻie lino, paʻu o manu ma isi mea. Na matuā tele mea na latou foaʻi. O lea na faapea atu ai Mose iā i latou: ʻUa lava nei mea. Aua le toe aumaia nisi mea.’

E toʻatele tamāloloa ma fafine na popoto e fai galuega, na fesoasoani i le faia o le faleʻie paia. O Ieova na foaʻiina atu le poto iā i latou e faia ai lenā galuega. O isi sa miloina filo, lalagaina ie, pe suʻiina foʻi teuteu. O isi sa faamauina maa, faia galuega i auro po o le vaneina foʻi o laau.

Na faia e tagata le faleʻie paia e pei o le auala sa faatonuina i latou e Ieova e fai ai. Sa latou faia se ʻie pupuni matagofie e vaeluaina ai le faleʻie paia i vaega e lua, o le Mea Paia ma le Mea e Sili Ona Paia. Sa iai i le Mea e Sili Ona Paia le atolaau o le feagaiga, lea sa faia i le laau o le setima ma le auro. Ae sa iai i le Mea Paia se tuugāmolī auro, se laulau, ma se fata e faamū ai mea manogi. Sa iai i le lotoā se faatanoa e fai mai i le ʻapamemea, ma se fata faitaulaga telē. O le atolaau o le feagaiga, na faamanatu atu ai i tagata Isaraelu la latou  folafolaga sa faia e usiusitaʻi iā Ieova. E te iloa le uiga o le feagaiga? O le feagaiga o se ituaiga o folafolaga faapitoa.

Na filifilia e Ieova Arona ma ona atalii, ina ia galulue o ni ositaulaga i le faleʻie paia. Sa tatau ona latou vaavaaia lelei, ma faia ai i inā taulaga iā Ieova. E na o Arona le ositaulaga sili, sa faataga ona ulu atu i le Mea e Sili Ona Paia. E faatasi i le tausaga ona ia faia lenā mea ina ia ofo atu ai taulaga mo ana agasala, o agasala a lona aiga, ma agasala a le nuu atoa o Isaraelu.

Na māeʻa ona faia e tagata Isaraelu le faleʻie paia, ina ua mavae le tasi le tausaga talu ona latou ō ese mai i Aikupito. O lea la, ua iai le fale e latou te tapuaʻi atu ai iā Ieova.

Na tumu le faleʻie paia i le pupula o Ieova, ma na iai se ao i luga aʻe o le faleʻie paia. Na iloa e tagata Isaraelu pe a tumau pea ona iai le ao i luga o le faleʻie paia, e tatau foʻi ona latou nonofo ai pea i inā. O le taimi lava e alu ese ai le ao, ona latou iloa foʻi lea e tatau ona latou ō i se isi nofoaga. E latou te tatala le faleʻie ma mulimuli atu i le mea e alu i ai le ao.