Su tempong i Musa su Wul᷊udu Sinai, i Yehuwa něngoro si sie pěkoạ kemah, nisěbạ tabernakel. Tau Israel botonge měngibadah si Sie su tampạ ene. Tabernakel botonge bawaěng mạeng i sire měngal᷊ing.

Yehuwa naul᷊ị, ’Pẹ̌dorong sumbangan bahan bọu wangsa ene gunang měkoạ tabernakel.’ Tau Israel něgělị bul᷊aeng, perak, tembaga, batu maarěga, perhiasan, benang wol, linen, pising binatang, dingangu barang bal᷊inẹ. Sumbangan i sire sěbạe mal᷊awọ, hakị u i Musa nẹ̌bera, ’Bahan seng natimu. Kuhạe saụ mẹ̌bawa.’

Lawọ esẹ dingangu wawine mapande měhal᷊ẹ̌ lai nẹ̌tul᷊ung někoạ tabernakel. Yehuwa nẹ̌tul᷊ung si sire tadeạu mapande měkoạ haghing barang. Piạ u někoạ benang dingangu hekạ, měnggepẹ, měmasẹ̌ batu, měkoạ barang bọu wul᷊aeng, arau měmakang kalu.

I sire někoạ tabernakel mẹ̌sul᷊ung kere niparentang i Yehuwa. I sire někoạ horden sěbạe masadadạ gunang měmahiạ tabernakel makoạ darua bageang, Ruang Masusi dingangu Ruang Sěbạe Masusi. Su Ruang Sěbạe Masusi, piạ tabut pẹ̌dariandi nikoạ bọu kalu akasia dingangu wul᷊aeng. Su Ruang Masusi, piạ mezbah gunang měnutung dupa, tampạu sol᷊o bọu wul᷊aeng, dingangu meda. Su rělahe, piạ bakẹ̌ bọu tembaga dingangu mezbah gěguwạ. Tabut pẹ̌dariandi makakoạ tau Israel mẹ̌tahěndung dianding i sire gunang tumuhụ si Yehuwa.

 Yehuwa němile si Harun dingangu manga anạe esẹ gunang makoạ imang su tabernakel. I sire harusẹ̌ měngurusẹ̌ tabernakel dingangu měgělị sasěmbah si Yehuwa. Kětạeng i Harun botonge sumuẹ̌ su Ruang Sěbạe Masusi, ual᷊ingu i sie kai imang mawantugẹ̌. I sie sumuẹ̌ sene sěntaung sěnsul᷊ẹ gunang měgělị sasěmbah tadeạu dosane, dosang keluargane, dingangu dosang bangsa Israel botonge ampungang.

Tabernakel nasueng koạe sěntaung dongkeng i sire siměbang bọu Misirẹ̌. Su tempo ene, i sire seng piạ tampạ gunang měngibadah si Yehuwa.

Yehuwa mal᷊uasẹ̌ ual᷊ingu piạ tabernakel ene, kụ i Sie někoạ piạ binawa siměpụ su wowong tabernakel. Mạeng binawa ene tatapẹ̌ su wowong tabernakel, tau Israel tatapẹ̌ mẹ̌kema. Katewe, mạeng binawa ene nahengkẹ, i sire masingkạ ene tempone dumal᷊eng. I sire sarung měmongkarẹ̌ tabernakel kụ dumal᷊eng tumol᷊e binawa ene.