I nia i te mouˈa Sinai, ua parau Iehova ia Mose ia patu i te hoê tiahapa taa ê, parauhia te sekene. I reira te mau Iseraela e haamori ai ia ˈNa. E nehenehe ratou e afai i tera sekene ia ratou ra a haere ê ai ratou.

Ua parau Iehova: ‘A parau i te nunaa ia horoa i ta ratou e nehenehe no te patu i te sekene.’ Horoa ˈtura to Iseraela i te auro, te ario, te veo, te mau ofai moni rahi e te mau piru. Ua horoa ˈtoa ratou i te huruhuru mamoe, te ahu lino, te mau iri animara e e rave rahi atu â taoˈa. Inaha mea rahi roa te taoˈa ta ratou i afai mai, ua parau atu Mose: ‘Ua oti, ua navai! Eiaha e afai faahou i te taoˈa.’

E rave rahi tane e vahine aravihi tei apiti mai i roto i te paturaa i te sekene. Maoti Iehova i aravihi roa ˈi ratou i roto i te ohipa. Ua nira e ua hamani vetahi i te ahu. Ua ohipa te tahi atu i nia i te mau ofai moni rahi e te auro. Te vai atoa ra o tei tarai i te raau.

Ua patu te nunaa i te sekene mai ta Iehova i faaue atu. Ua hamani ratou i te hoê paruru nehenehe mau no te faataa i te sekene na roto e piti tuhaa: te Vahi Moˈa e te Vahi Moˈa Roa. I roto i te Vahi Moˈa Roa, te vai ra te afata faufaa. Ua hamanihia te reira maoti te raau sitima e te auro. I roto i te Vahi Moˈa, te vai ra te hoê vairaa lamepa auro, te hoê airaa maa e te hoê fata no te tutui i te mea noˈanoˈa. I roto i te aua, e itehia te hoê farii pape veo e te hoê fata rarahi. Maoti te afata faufaa, e haamanaˈo te mau Iseraela i ta ratou i euhe, oia hoi ia faaroo ia Iehova. Ua ite anei oe eaha te hoê faufaa aore ra faaauraa? E au te reira i te hoê euhe taa ê.

 Ua maiti Iehova ia Aarona e i ta ˈna mau tamaiti no te ohipa i te sekene ei tahuˈa. E mea titauhia ia ratou ia haapao i te sekene e ia pûpû i te mau tusia ia Iehova i te sekene. O Aarona anaˈe, te tahuˈa rahi, te nehenehe e tomo i roto i te Vahi Moˈa Roa. E tomo atu oia hoê taime i te matahiti no te pûpû i te hoê tusia no ta ˈna mau hara, te hara a to ˈna utuafare e te hara a te nunaa Iseraela.

Ua oti te mau Iseraela i te paturaa o te sekene hoê matahiti i muri aˈe i to ratou faarueraa ia Aiphiti. I teie nei, e vahi ta ratou no te haamori ia Iehova.

Ua faaite Iehova e ua au roa oia i te sekene e ua faatupu oia i te hoê ata i nia i te reira. Ia vai te ata i nia i te sekene, e vai noa ïa to Iseraela i te vahi i faatiahia ˈi te puhapa. Ia haere râ te ata i nia ˈtu â, ua ite ia ratou e e taime tera no te haere ê. E amo ratou i te sekene e e pee ratou i te ata.