Tamy Mosesy tamy Bongo Sinay tan̈y, Jehovah nan̈iraka izy han̈amboatra tran̈olay. Tran̈olay masin̈y an̈aranizio. Tao fan̈anovandro Israelita aby io fanompoan̈a Jehovah. Baka io nety nindesindro nan̈araka iro izio isaka iro nifindra.

Jehovah nivolan̈a: ‘Iraha olo jiaby han̈amia zay raha tindrindro han̈amboaran̈a tran̈olay io.’ Ke Israelita aby io nan̈amia volamena, volafotsy, varahin̈y, vatosoa, baka io kavin̈y ndreky ravaka. Iro koa nan̈amia taretry, lalainy, hodriky biby, ndreky raha maro koa. Nazoto nan̈amia iro, ke farany Mosesy nivolan̈a tamindro: ‘Basy eky! Mahampy zay!’

Samy nampiasa fahaizan̈anany iro lelahy ndreky man̈angy aby io tamy zen̈y. Tao ny nan̈ano taretry, nanjaitry, ndreky nan̈ano sanjinizio. Sasany namepiky vato, nanefy volamena ndreky nandoaka kakazo.

Narehanolo aby io raha jiaby nivolan̈iny Jehovah. Iro nan̈amboatra rido tsara nan̈efitry tran̈olay io aroe. Efitry araiky Masin̈y, fa araiky ndraiky Farany Masin̈y. Taminy araiky Farany Masin̈y io nisy vata misy fifan̈ikian̈a. Kakazo akasia ndreky volamena niasan̈a vata io. Taminy araiky Masin̈y tao nisy raha fipitrahany jiro volamena, latabatra ndreky alitara fan̈oroan̈a raha mangitry. Tan̈aty lakoro tao nisy kovety varahin̈y ndreky alitara maventy. Vata misy fifan̈ikian̈a io nampatsiaro iro  Israelita aby io volan̈andro han̈araka raha jiaby nivolan̈iny Jehovah tamindro. Ino ma fifan̈ikian̈a zen̈y, koa hainao? Olo man̈ano fifan̈ikian̈a zen̈y mitovy aminolo mifanta fo.

Jehovah nifidy Arona dreky zanany lelahy aby io niasa tamy tran̈olay masin̈y tao. Iro natao pisoron̈o. Iro nikarakara tran̈olay io ndreky nan̈ano fan̈atitry tamy Jehovah. Fa Arona pisoron̈obe. Izy zaraiky fo nahazo niditry tamy Farany Masin̈y tao. Izy miditry ao indraiky isaka taon̈o. Nan̈ano soron̈o izy tao baka ambelany Zan̈ahary fahotan̈anany, ndreky niny fianakavian̈anany, baka io fahotan̈any firenenany Israely jiaby.

Taon̈o araiky tafarany nialany Israelita aby io ta Ezipta iro nahavita tran̈olay masin̈y io. Ke tao nan̈anovan̈a fanompoan̈a Jehovah.

Nataony Jehovah feno voninahitrinany tamy tran̈olay masin̈y io. Baka io nataony nisy rondro tan̈abony raha io. Iro Israelita aby io tsy nandeha, rondro io koa tsy niala tan̈abony tran̈olay masin̈y tio. Izikoa rondro io fa niteky, iro loso nandeha nan̈araka izio. Niravan̈indro koa tran̈olay masin̈y io, baka io nindesindro.