Dxi nuu Moisés lu dani Sinaí, gudxi Jiobá laabe gucuibe ti tabernáculo. Ti tabernáculo nga ti yoo de lari ra zanda guni adorar ca israelita Dios. Ne zanda chinécabe tabernáculo que ratiica si chécabe.

Jiobá guníʼ: «Gunabaʼ guidxi ca gudii biaʼ naʼ ladxidóʼ para gacané cuí tabernáculo ca». Yené ca israelita stale cosa risaca de oro, plata, cobre ne guié sicarú. Laaca bidiicabe lana, lino, guidiladi maniʼ ne xcaadxi cosa. Guizáʼ nachaʼhuiʼ gúcacabe purtiʼ stale cosa bidiicabe dede gudxi Moisés laacabe: «Maʼ ngasi, maʼ cadi guedanérutu jma».

Stale hombre ne gunaa gucané para gurí tabernáculo que. Bidii Jiobá guendabiaaniʼ laacabe para guiree ca dxiiñaʼ que jneza. Guyuu tu bizáʼ hilu, ni gudiba ne ni biʼniʼ bordadu. Xcaadxi bizáʼ cosa de oro, ni bigá ne biquiidiʼ ca guié sicarú que ne ni bizáʼ cosa de yaga.

Biʼniʼ guidxi que tabernáculo que casi biʼniʼ mandar Jiobá laacaʼ. Bizáʼcabe ti cortina guizáʼ sicarú, guluucabe ni ndaaniʼ tabernáculo que para gaca ni chupa cuartu ni biree lá: Santo ne Santísimo. Ndaaniʼ Santísimo que, nuu Arca stiʼ pactu, bizáʼcabe ni de yaga de acacia ne oro. Ndaaniʼ Santo que nuu ti candeleru de oro, ti mexaʼ ne ti altar para chaquiʼ incienso. Lu patiu que nuu ti palangana de cobre ne ti altar naroʼbaʼ. Biʼniʼ prometer ca israelita zuzuubacaʼ stiidxaʼ Jiobá. Arca stiʼ pactu que gucané ni laacabe cadi gusiaandacabe promesa bíʼnicabe. ¿Nánnaluʼ xii nga ti pactu la? Laani nga ti promesa especial.

 Gulí Jiobá Aarón ne ca xiiñiʼ para gácacaʼ sacerdote ne gúnicaʼ dxiiñaʼ ndaaniʼ tabernáculo que. Dxiiñaʼ stícabe nga gápacabe ni ne gúnicabe sacrificiu raqué. Aarón si nga zanda chuʼ ndaaniʼ lugar ni láʼ Santísimo purtiʼ laa nga sumo sacerdote. Ti biaje lu ti iza riuube lugar que para gudiibe sacrificiu pur ca pecadu stibe, stiʼ xfamiliabe ne stiʼ guidxi Israel.

Ti iza despué de biree ca israelita de Egipto bilúxecaʼ tabernáculo que. Yanna huaxa maʼ nápacabe ti lugar ra guni adorárcabe Jiobá.

Guluu Jiobá ti za ique tabernáculo que ne bidxá guendanandxóʼ stiʼ ndaaniʼ ni. Zaqué bisihuínnibe cayéchebe. Ora riaanadxí za que ique tabernáculo que riaana ca israelita raqué. Peru pa guiasa ni, nánnacabe naquiiñeʼ chécabe sti lugar. Ruchiácabe tabernáculo que ne maʼ zinándacabe za que.