Ho Moize adu ni rii Bagangara Sinai yo, Yekova aya fuko ko mbakadi kparakpara bamburoko, rimoho angia banye, nga gu ba aYisaraere arengbe ka irisoko rogoho. Si adu nga i nikaa tinda gu banye re nayo ku rogo agu aba i nikaa ndu ku rogoho.

Yekova aya: ‘Mo ya fu aboro i fuku agu ahe rengbe yo ka fuhe tipa ka undo sunge mbakada banye.’ AYisaraere afu dahabu, feda, tara, na wenewene ambia fongo, na afongo. I afu aremu, kpoto anya, na gu kura wene ahe a. I agamu ahe ni bakerehe si ki da nga Moize ya fuyo: ‘Ahe ima rengba! Ka oni yengo na ni berewe ya.’

Dungu agu akumba na adee naadu na inohe aundo na sunge mbakada banye. Yekova afu tatamana fuyo tipa gu sunge re. Aguyo audi agire, aguyo ki mbakadi aroko, watadu ka rungo ho. Aguyo kini seke ambia, ni mangisunge na dahabu, watadu seka angua.

Aboro ambakadi banye kina wai Yekova agumbaha. I ambakadi wene kperoko tipa ka kparaka vuru banye yo ku rogoyo ue, ziazia ba gbiati Kparakpara Ziazia Ba Kisusi. Sanduki mokido adu rogo Kparakpara Ziazia Ba Kisusi, i ambakadihe rogo gu ngua nga dengbe na dahabu. Rogo Ziazia ba, mbisa adu yo rogo giri dahabu yo, gbiati bamotumo tipa ka zo guzuguzu fuõngua. Bakere kurungbu nga ga tara adu vurukporo gbiati bakere bamotumo. Sanduki mokido aatingida aYisaraere na pa gayo kidohe tipa ka giasangba Yekova. Mo ini ginihe nga mozunga? Si nga kparakpara kidohe.

 Yekova asia Arona na awiriko i nimangisunge tii banye yo ni aboromotumo. Si adu nga i ningere fuani na kini fu motumo yo fu Yekova. Kina Arona sa nangia gbiamotumo, narẽ tipa ka rimo ku rogo gu Kparakpara Ziazia Ba Kisusi. Ko anaamangaha bara sa rogo garã yo tipa ka fu motumo tipa gako ingapai, na gu nga ga gako aborokporo, gbiati gu ingapai nga ga aYisaraere dunduko.

AYisaraere anyasi sunge banye fuo garã sa fuo kura yo Ezipeta yo. Awere i adu na ba beyo tipa ka iriso Yekova.

Yekova ahisi banye na gako taarimo na ki sa gupai nga rungbutorungbuto mai ru bariihe. Ho gu rungbutorungbuto mai re anidu ni rii banye, aYisaraere anaaguaringa bayo te. Ono ho si aniguari ni, i anainoho nga gere nga regbo tipa i tona nduge. I anaadia gu banye re na ki tona ka pekafuo gu rungbutorungbuto mai re.