Órni goyoʼ Moisés laidy dainy Sinaí, Jehová góoch láabu nasaʼbu toib tabernáculo. Tabernáculo cú gocni toib yoʼ lairy ro bienyibu Jehová. Né labúu nachiilyibu láani par ninéyibu láani rotísi ñeeyibu.

Jehová goniʼ: «Gonab guirá israelitas guiduidyibu nitisi cós ni napyibu par guiaʼ tabernáculo». Israelitas goynéyibu or, plata, cobre, guiee móz, guipdiag, guipnil né stipnés cós. Láaca goynéyibu guitzlaidy xiil, lino, guidlaidy nimal né stipnés cós. Biscadyibu xidalgoluʼ cós, por ngú Moisés góoch layibu: «Ma diti guitnéto más cós, ¡ma goygaʼlni!».

Xidal buñguieeu né buñgonaʼ gocnéyibu par goyaʼ tabernáculo cú. Jehová biduidy galnaní layibu par labúu bisaʼtzayibu láani. Tipnésyibu bunytzaay lairy, buny bordad, né stipnés bunyibu dxiin né or, bichocyibu guiee né bicuatzayibu láani né láaca bunytzaayibu yac.

Israelitas bisaʼyibu tabernáculo modpa goniʼ Jehová gacni. Biquiinyibu tlaʼ lairy móz par bitzoyibu galaʼni, toib cuart góc laa: Santo né stoibcu góc laa: Santísimo. Lainy toib cuart ni góc laa Santísimo goyoʼ arca xtuny acuerdo ni goyaʼ né yac acacia né ór. Lainy Santo goyoʼ toib candeler de or, toib mexh né toib lagary ro bisaʼijyibu incienso. Gopni toib láachluʼ né cú goyoʼ toib palangan de cobre né altar xiroʼ. Órni israelitas bibiʼyibu arca xtuny acuerdo, nimaca bisetnaladxyibu acuerdo ni bunyibu  né Jehová, órni biduidyibu xtiitzyibu guisobdiitzyibu Jehová. ¿Nanlo xí láani ngú toib acuerdo la? Láani ngú órni buñ raduidy xtiitz gony toib cós.

Jehová golúbu Aarón né xiin par ñacyibu sacerdotes né ñonyibu dxiin lainy tabernáculo cú. Non ñanyibu láani né naduidyibu galrrascad a Jehová. Nosi Aarón ni góc sumo sacerdote labúu goyoʼ lainy Santísimo né goyoʼbu lainyni toib buelt ló tobiz par ñonybu toib galrrascad a Jehová par natuidy Jehová xcalkiébu scásiʼ, xcalkié xfamilybu né xcalkié guirá israelitas.

Israelitas bilox bisaʼyibu tabernáculo ló tobiz de goló bireʼyibu Egipto. Orcúra ma gopyibu toib lagary par ñenyibu Jehová.

Jehová bislooybu que bibaladxbu mod goyaʼ yoʼcu por ngú goloʼbu toib xcaay guic yoʼcu né lainyni bidzani de xcalnadip Dios. Pal xcaaycu riaʼanni toibsi lagary laidy tabernáculo, israelitas bisaladxyibu cú. Per pal xcaaycu riaskiaʼ, raduidyibu cuent que non tzeeyibu stoib lagary. Ór cú rachílyibu tabernáculo cú né rinalyibu xcaaycu.