Nyithindho mir Israel gigam givaru kud i kum got Sinai man gicidh gigonjo i kabedo moko ma julwong’o Kadec i langa mi Paran. Ku keca Yehova uyero ni Musa kumae: ‘Or dhanu 12, ng’atu acel acel kud i kind suru ceke mir Israel, kara gicidh gilib ng’om Kanan m’abimio ni nyithindho mir Israel.’ E Musa ung’io dhanu 12 man eyero igi kumae: ‘Wucidhi i Kanan, wunen ka nyo ng’ombe cego cam. Wunen bende ka nyo dhanu mi ng’ombe gitek kunoke nyo kero migi mbe, unen ka nyo gikwo i the hema kunoke nyo i udi ma tek.’ Julib 12, uketho i ie Yocuwa giku Kaleb gigam gimondo i Kanan.

I ng’ei nindo 40, julib maeno gidwogo ku jang ulok ma nyinge n’i kume, nying ulemo, man nying ubolo. Kinde ma gidwogo, gikoro kumae: ‘Etie ng’om ma ber mandha, re dhanu mi ie gitek man gitwodo adhura migi ku gang’ ma wiw.’ Kaleb ugam uyero kumae: ‘Wek waidhu i kumgi kawoni! Kum waromo voyogi’. Nyo ing’eyo nia pirang’o Kaleb uyero lembuno? Eyero lembuno pilembe en giku Yocuwa gigeno Yehova. Ento julib apar mange gidwoko kumae: ‘Wacopo idho malu ngo! Kum dhanu ma kuca gilazangara! Wadok wabedo i wang’gi ve usene.’

Lembuno uturo cwiny nyithindho mir Israel. Gicaku wagiri man giyero i kindgi kumae: ‘Wakethu jutelwic i wiwa man wadoku i  Misiri. Pirang’o wacidh i ng’ombe man junegwa ku palamularu?’ Yocuwa giku kaleb giyero kumae: ‘Kud ujai ni Yehova man lworo kud unegwu. Yehova bigwokowa.’ Ento nyithindho mir Israel giwinjo ngo. Gimito gineg Yocuwa giku Kaleb cen!

Yehova ugam utimo ang’o? Eyero ni Musa kumae: ‘I ng’ei lembe ceke m’atimo ni nyithindho mir Israel de asu gibewora ngo. Pieno dong’ gibitimo oro 40 i langa man gibitho kuca. Yocuwa giku Kaleb kendgi man awiya migi re ma gibikwo i ng’om mi lembang’ola.’