Bon ba Israel ba bi nyodi i Hikôa Sinai, ba ke liké i ñoñ Paran letee ni homa ba nsébél le Kades. Nyoo nyen Yéhôva a kal Môsé le: ‘Om bôlôm 12, wada ikété hiki litén, inyu pôôbe loñ Kanaan, me ga ti bon ba Israel.’ Môsé a pohol bôlôm 12, a kal ki bo le: ‘Kena i loñ Kanaan, ni béñge too hisi hi, hi ngwel bijek ngandak. Ni béñge too bôt ba loñ ba mbomb tole ba gwé ngui, too ba nyééne mandap ma mabadô tole i bitison.’ Ikété 12 li bôt li bi ke i mbep i loñ Kanaan, di yé le di sima Yôsua bo Kaleb.

I mbus 40 ma dilo, bôt ba mbep ba témb. Ba lona faigé, grénad ni matam ma minkôô mi wai. Bôt ba mbep ba kal le: ‘Hisi hi yé hilam ngandak. Ndi bôt ba loñ ba yé mimpémba, yak bitison bi gwé mapénd ma yé ngii ngandak.’ Ndi Kaleb a kal le: ‘Di nla yémbél bo. Di kenek i jôs bo nano!’ Baa u nyi inyuki Kaleb a bi pot hala? Inyule nye ni Yôsua ba bé bôdôl Yéhôva ñem. Ndi bana bôt ba mbep bape, ba bi kal le: ‘To! I bôt ba, ba yé mimpémba, ba bak ki mimbôñgô! Di yé kiki bitandi i mis map.’

Makénd ma bon ba Israel ma bi mal. Ba bôdôl tjelel, ba kalak bo ni bo le: ‘Loga, di téé ñane numpe, nu a ntémbna bés i loñ Égiptô. Inyuki di nlama ke nyoo i loñ Kanaan inyu boñ le ba nol  bés?’ Ndi Yôsua bo Kaleb ba kal le: ‘Di ndogbene bañ Yéhôva, di kon bañ ki to woñi. Yéhôva a’ sôñ bés.’ Ndi, bon ba Israel ba bi emble bé. Ba sômbôl yak nol Yôsua bo Kaleb!

Kii Yéhôva a bi boñ? A kal Môsé le: ‘Ni mam momasôna me mbôñôl bon ba Israel, ba ngi kenek ni bisu i ndogbene me. Jon, b’a yén i ñoñ 40 ma nwii, nyoo nyen b’a wél. Ndik bon bap ni Yôsua bo Kaleb bon ba ga niñ hisi me bi bôn bo.’