Pinda ma halak Israel sian Dolok Sinai. Dilewati nasida do padang belantara Elaparan laho tu Kades. Di Kades, didok Jahowa ma tu si Musa, ‘Suru ma 12 baoa sian ganup marga gabe mata-mata tu tano Kanaan. I ma tano na laho hulehon tu bangso Israel.’ Dipillit si Musa ma 12 baoa. Didok ma tu nasida, ‘Laho ma hamu tu Kanaan, ida hamu ma atik na tutu do subur tano disi manang na ndang. Gogo do jolma disi manang na ndang. Di kemah-kemah do nasida tinggal manang di kota.’ Sian 12 mata-mata i, dohot do si Josua dohot si Kaleb.

Dungkon 40 ari, mulak ma nasida. Diboan nasida ma buah ara, delima dohot anggur. Dipaboa nasida ma, ‘Subur do tano disi jala gogo do halak disi. Tinggal di kota do nasida jala timbo tembokna.’ Didok si Kaleb ma, ‘Boi do tataluhon nasida. Beta ma hita tusi!’ Boasa barani si Kaleb mandok songon i? Ala porsea do ibana dohot si Josua tu Jahowa. Alai sampulu mata-mata na asing mandok, ‘Unang! Balga-balga do halak i songon raksasa! Hira belalang do hita di nasida.’

Gabe mabiar ma halak Israel jala marungut-ungut ma nasida. Didok ma, ‘Tapillit ma pamimpin, asa mulak hita tu Mesir. Mate do hita molo dison!’ Didok si Josua dohot si Kaleb ma, ‘Ingkon unduk do  hita tu Jahowa, unang mabiar. Urupanna do hita.’ Alai ndang olo halak Israel manangihon. Gariada, naeng dipamate nasida do si Josua dohot si Kaleb!

Aha ma na diulahon Jahowa? Didok ma tu si Musa, ‘Nunga godang na hubahen tu bangso on, alai tong dope nasida ndang unduk tu ahu. Alani i, di padang belantara on ma nasida saleleng 40 taon. Mate dison nama nasida. Holan si Kaleb, si Josua dohot gelleng ni nasida do na boi masuk tu tano na hujanjihon i.’