Naghali an mga Israelita sa may Bukid nin Sinai asin nagbaklay sa disyerto nin Paran pasiring sa lugar na inaapod na Kades. Duman sinabi ni Jehova ki Moises: ‘Magsugo ka nin 12 lalaki, saro hali sa kada tribo, para mag-espiya sa Canaan, an lugar na itatao ko sa mga Israelita.’ Kaya nagpili si Moises nin 12 lalaki asin sinabihan sinda: ‘Magduman kamo sa Canaan, asin hilingon nindo kun marahay pagtanuman an daga. Aramon nindo kun makukusog o maluluya an mga tawo, kun nakaistar sinda sa mga tolda o sa mga siyudad.’ Nagduman sa Canaan an 12 espiya, an duwa sainda iyo si Josue saka Caleb.

Pakalihis nin 40 aldaw, nagbalik an mga espiya na may dara-darang mga prutas na igos, granada, saka ubas. Nagbareta an mga espiya: ‘Magayon an lugar, kaso makukusog an mga tawo asin haralangkaw an mga lanob kan mga siyudad.’ Pero sinabi ni Caleb: ‘Kaya ta sindang daugon. Sumalakay na kita!’ Aram mo kun taano ta sinabi iyan ni Caleb? Nagtitiwala kaya sinda ni Josue ki Jehova. Pero su sampulong espiya nagsabi: ‘Dai! Darakulaon an mga tawo duman, garo mga higante! Garo sana kita mga lukton sa paghiling ninda.’

Nagluya an buot kan mga Israelita. Nagreklamo sinda asin nagsabi sa kada saro: ‘Magpili kita nin bagong lider tapos bumalik na kita sa Ehipto. Taano ta maduman kita sa Canaan para magadan?’ Si Josue  saka Caleb nagsabi: ‘Dai nindo pagsuwayon si Jehova, saka dai kamo matakot. Poprotektaran kita ni Jehova.’ Pero dai nagdangog an mga Israelita. Gusto pa ngani nindang gadanon si Josue saka Caleb!

Ano an ginibo ni Jehova? Sinabi niya ki Moises: ‘Pagkatapos kan gabos na ginibo ko para sa mga Israelita, dai pa man giraray ninda ako sinusunod. Kaya digdi sana sinda sa kaawagan sa laog nin 40 taon sagkod na magadan sinda. An mga aki sana ninda pati si Josue saka Caleb an makakaistar sa lugar na ipinangako kong itatao sa sainda.’