Berangkat me kalak Israel arah Gunung Sinai nari, nce ilewatina gurun pasir Paran, seh me kalak e i Kades. Ngerana Jahwe man Musa, nina, ‘Utus 12 mata-mata ku Kanaan, taneh si ateKu Kubere man kena. Buat sada kalak arah tiap suku.’ Emaka, ipilih Musa me 12 kalak, janah katakenna man kalak e, ‘Laweslah kam ku Kanaan, nenndu uga tanehna i je, mehumur nge ntah lang, nen ka uga kalak si tading i je, megegeh ntah lang. Nen uga ingan kalak e tading, bas tenda saja ntah erbenteng nge.’ Lawes me 12 mata-mata e ku Kanaan, termasuk Josua ras Kalep.

Kenca 40 wari, mulih me kalak e kerina, janah ibabana buah ara, delima, ras anggur. Ilaporken kalak e, nina, ‘Tuhu mejile tanehna, tapi kalakna gedang ras galang, kutana pe ertembok.’ Nce nina Kalep, ‘Banci nge sitaluken kalak e. Otah si serang!’ Tehndu ngkai maka bage nina Kalep? Perban Kalep ras Josua tek man Jahwe. Tapi nina si sepuluh kalak, ‘Lo padah siserang! Gedang ras galang kel kalakna i jah, bagi raksasa! Bagi labang kita adi ibandingken ras kalak e.’

Mbiar me kerina kalak Israel e. Emaka ngerana-ngerana ia janah jungut-jungut nina, ‘Ota tah sipilih peminpin si mbaru gelah mulih kita ku Mesir, erkai kita jenda, mate kari kita.’ Emaka nina Josua ras Kalep, ‘Ula kita mbiar, ula silawan Jahwe. Ikawali Jahwe nge kari kita.’ Tapi la nggit kalak Israel megikenca. Ibunuhna atena Josua ras Kalep!

Nce kai si ilakoken Jahwe? Nina Jahwe man Musa, ‘Nggo Kubere kerina man kalak Israel, tapi la ia nggit patuh man bangKu. Adi bage, Kupeturut kalak e tading 40 tahun i gurun e, gelah i je kalak e mate. Anak-anakna saja ras Josua ras Kalep si masuk ku taneh si Kujanjiken e.’