Jiñi israelob tsaʼ loqʼuiyob majlel yaʼ ti wits Sinaí. Tsiʼ chaʼleyob xʌmbal yaʼ ti tiquin bʌ lum i cʼabaʼ Parán cʼʌlʌl yaʼ ti tejclum Cades. Jehová tiʼ sube Moisés: «Choco majlel 12 wiñicob yaʼ ti Canaán, juntiquil ti jujumpʼejl tribu, chaʼan miʼ majlel i qʼuelob jiñi lum muʼ bʌ caj cʌqʼuen jiñi israelob». Jin chaʼan Moisés tsiʼ yajca 12 wiñicob i tiʼ subeyob: «Cucula ti Canaán i qʼuelela mi weñʌch jiñi lum chaʼan mi lac pʌcʼ chuqui la com. Qʼuelela mi pʼʌtʌlob, mi chumulob ti pisil bʌ otot o mi colemix bʌ tejclum». Jiñi 12 wiñicob tsaʼ majliyob ti Canaán. Tsaʼ majli jaʼel Josué yicʼot Caleb.

Tsaʼ chaʼ cʼotiyob ti 40 qʼuin. Tsiʼ chʼʌmʌyob cʼotel higo, granada yicʼot tsʼusub i tsiʼ yʌlʌyob: «Canaán weñʌch bʌ lum, pero wen pʼʌtʌlob i jiñi tejclum wen chan i murojlel». Pero Caleb tsiʼ yʌlʌ: «¡Miʼ mejlel lac chilbeñob jiñi lum! Conla ti Canaán». ¿Chucoch cheʼ tsiʼ yʌlʌ Caleb maʼ wʌl bajcheʼ jiñi? Come Caleb yicʼot Josué miʼ yʌcʼob ti ñuc i tʼan Jehová. Pero jiñi yambʌ 10 wiñicob tsiʼ yʌlʌyob: «Mach yom mi lac majlel come wen chañob. Lajalonla bajcheʼ sajcʼ mi tsaʼ lac laji lac bʌ la quicʼotob».

Jiñi israelob tsaʼ ochiyob i bʌqʼuen, tsaʼ cajiyob ti wulwul tʼan i tsiʼ yʌlʌyob: «Laʼ lac waʼchocon yambʌ lac yum i chaʼ conla ti Egipto. ¿Chucoch mi caj lac majlel ti Canaán? ¿Chaʼan mi lac tsʌnsʌntel?». Josué yicʼot Caleb tsiʼ yʌlʌyob: «Laʼ lac jacʼben i tʼan Jehová. Jin mi caj  i cʌntañonla. Mach laʼ chaʼlen bʌqʼuen». Pero maʼañic tsiʼ chʼujbibeyob i tʼan. Yomix i tsʌnsañob Josué yicʼot Caleb.

¿Chuqui tsiʼ mele (chaʼle) Jehová? Tiʼ sube Moisés: «Cabʌl chuqui utsʼat an c chaʼleyob tiʼ tojlel..., pero muʼto i chʌn ñusañob c tʼan. Jin chaʼan 40 jab mi caj j cʌyob wʌʼ tiʼ tiquiñal lum cʼʌlʌl miʼ chʌmelob. Cojach i yalobilob, Josué yicʼot Caleb, mi caj i chumtʌlob yaʼ ti lum tsaʼ bʌ c ñaʼta cʌqʼuen jiñi israelob».