Nditọ Israel ẹma ẹdaha ke Obot Sinai ẹsan̄a ẹkesịm Kadesh ke wilderness Paran. Jehovah ama ọdọhọ Moses ete: ‘Sio owo 12 dọn̄ ẹka ẹkeyep isọn̄ Canaan emi nyomde ndinọ nditọ Israel. Sio owo kiet kiet ke esien kiet kiet.’ Moses ama osio owo 12 onyụn̄ ọdọhọ mmọ ete: ‘Ẹka ẹkese m̀mê isọn̄ Canaan ọfọn se ẹtọde n̄kpọ. Ẹse m̀mê mbon Canaan ẹkop odudu m̀mê ikopke, m̀mê mmọ ẹnyụn̄ ẹdụn̄ ke tent m̀mê ke ikpọ obio.’ Mbon uyep 12 oro ẹma ẹkeyep isọn̄ Canaan. Joshua ye Caleb ẹma ẹsine ke otu oro.

Ke usen 40 ebede, owo 12 oro ẹma ẹmen fig, pomegranate, ye grape ẹnyọn̄ ẹdi. Mmọ ẹma ẹdidọhọ ẹte: ‘Isọn̄ oro edi eti isọn̄, edi ata n̄kpọsọn̄ owo ẹdụn̄ do, mmọ ẹnyụn̄ ẹbọp ikpọ ibibene ẹkanade mme obio mmọ.’ Edi Caleb ama ọdọhọ ete: ‘Imekeme ndikan mmọ. Ẹyak isọsọp ika!’ Nso ikanam Caleb etịn̄ ntre? Enye ye Joshua ẹma ẹbuọt idem ye Jehovah. Edi owo duop eken ẹma ẹdọhọ ẹte: ‘Ihih! Mmọ ẹkpon ẹnyụn̄ ẹkon̄! Nnyịn ikebiet ataktak ke iso mmọ.’

Esịt ama ọduọ nditọ Israel. Mmọ ẹma ẹtọn̄ọ ndiseme idem ẹnyụn̄ ẹdọhọ ke otu idemmọ ẹte: ‘Ẹyak imek owo efen ada nnyịn usụn̄ ifiak inyọn̄ Egypt. Nso ikpanam ika do yak ẹkewot nnyịn?’ Joshua ye Caleb ẹma ẹdọhọ mmọ ẹte: ‘Ẹkûsọn̄ ibuot ye Jehovah.  Ẹkûyak ndịk anam mbufo. Jehovah eyekpeme nnyịn.’ Edi nditọ Israel ikakpan̄ke utọn̄. Mmọ ẹma ẹkam ẹyom ndiwot Joshua ye Caleb!

Nso ke Jehovah akanam? Enye ama ọdọhọ Moses ete: ‘Kpa ye ofụri se nnamde nnọ nditọ Israel, mmọ isụk imaha ndikop uyo mi. Ke ntak oro mmọ ẹdidu ke wilderness emi isua 40, ndien mi ke mmọ ẹdikpan̄a. Nditọ mmọ ye Joshua ye Caleb kpọt ẹdidụn̄ ke isọn̄ emi n̄kọn̄wọn̄ọde ndinọ mmọ.’