D Israelite göhnd vom Berg Sinai weg und laufed dur d Wüeschti Paran. Wo si z Kadesch ihres Lager wider ufbaued, seit Jehova zum Moses: «Schick 12 Männer los, eine us jedem Stamm. Si sölled Kanaan genau go aluege, wil ich wirde das Land de Israelite gee.» Da wählt de Moses 12 Männer us und seit zu ihne: «Göhnd uf Kanaan und lueged, öb i dem Land vil Guets zum Esse wachst. Finded use, öb d Mensche dört starch oder schwach sind und öb si i Zelt lebed oder i Städt.» Di 12 Spion mached sich uf de Weg. Eine devo isch de Josua und en andere isch de Kaleb.

Nach 40 Täg chömmed d Spion zrugg und bringed feini Frücht mit: Fiige, Granatöpfel und Truube. Si verzelled: «Es isch es guets Land, aber d Mensche sind starch und es het höchi Muure um d Städt ume.» De Kaleb seit aber: «Mir chönnd si besiige. Chömmed, mir göhnd grad los!» Weisch du, wiso er das seit? Wil er und de Josua uf Jehova vertraued. Aber di andere 10 säged: «Nei, d Lüt dört sind riisig! Nebe dene gsehnd mir us wie Heugümper!»

Da chömmed d Israelite Angscht über. Si rüefed us und säged zunenand: «Wiso sölled mir dört hii gah? Demit mir umbracht werded? Chömmed, mir sueched üs en neue Afüehrer und göhnd zrugg uf Ägypte.» De Josua und de Kaleb säged: «Tüend Jehova folge. Ihr müend kei Angscht ha, er wird üs beschütze.» Aber d Israelite losed überhaupt nid uf de Josua und de Kaleb. Im Gegeteil, si wend di beide sogar töte.

Wie reagiert echt Jehova? Er seit zum Moses: «Ich ha eso vil für d Israelite gmacht und gliich losed si nid uf mich. Drum müend si 40 Jahr lang i de Wildnis blibe und dört sterbe. Nume ihri Chind und de Josua und de Kaleb werded einisch i dem Land lebe, wo ich de Israelite versproche ha.»