Oʼuna müshiijaʼa na israeliitakana saaʼujee tü uuchikat Sinaí, alatüshii naya süpaʼapünaa tü isashiipaʼa Parán münakat. Nantaka eemüin tü mma Cadés münakat. «Püjüta 12 ajayajülii nanaʼlaaiwa tü mmakat Canaán, tü mma taapajatkat namüin na israeliitakana. Püneeka naya wayuukana saʼakajee tü poloosükat piamamüin eʼirukuu», nümakalaka Jeʼwaa nümüin Moisés. «Juʼuna jümaala Canaánmüin jiʼraiwa müleka anale tia mmakat süpüla apünajaa. Jülüja jaaʼin wayuule katsüinshii na kepiakana chayaa, kepiale naya suluʼu piichi aainjuushi süka loona jee miyoʼule tü pueulo kaluʼukat naya», nümaka Moisés namüin na ajayajüliikana. Oʼuna müshiijaʼa na ajayajüliikana Canaánmüin, eejachi Josué otta Caleb namaa.

Sülatapa 40 kaʼi, aleʼejüshii na ajayajüliikana. Alüʼüjüshii naya higo, granada sümaa uuwa. Anuu nanüiki: «Anasü maʼin tü mmakat Canaán. Katchinpajaʼa maʼin na wayuu kepiakana chayaa otta miyoʼu maʼin süsepü tü pueulokot». Nümaka Caleb: «¡Wayamüleena naya! Anashii wountaale». ¿Jamüsüche saaʼin pümüin maka nünüiki Caleb? Shia süka niʼitaain naaʼin Caleb otta Josué nünain Jeʼwaa. Akanasaʼa na polookana ajayajülii, nnojotsü müin nakuwaʼipa. «Nnojo washutuin naaʼu, miyoʼuyuu otta katchinshii maʼin naya, noʼuteena aaʼin waya washutule naaʼu», müshii neʼe naya.

Eimmolojooshii otta aʼyounalaashii na israeliitakana. «Waneeka wanee wekiipüʼü waleʼejaaiwa Egiptomüin. Oʼutüneena aaʼin waya woʼunüle Canaánmüin»,  namaka. Nusoutaka Caleb nümaa Josué: «Anashii woonoole sümaa nünüiki Jeʼwaa. Naaʼinmajeena waya, nnojo mmoluin jia». Nnojoishii jaa müin naya, noʼutee aaʼinchi neʼe Caleb nümaa Josué.

¿Kasaka naaʼinrüin Jeʼwaa? Anuu nünüiki Jeʼwaa nümüin Moisés: «Wainmairü tü kasa anasü taaʼinrakat napüleerua na israeliitakana, ayatüshiʼiya macheʼein naya tamüin. Tayüülajeena naya chaa isashiipaʼa soʼu 40 juya, jee outeena naya chayaa. Nayeena neʼe na nachonniikana Josué otta Caleb tekerotireenaka suluʼu tü mma taapajakat namüin na israeliitakana».