Islaelivi lẹ tọ́n sọn Osó Sinai ji bo zingbejizọnlin gbọn danfafa Palani tọn ji yì lẹdo de mẹ he nọ yin Kadẹṣi. To finẹ, Jehovah dọna Mose dọ: ‘Do sunnu 12 hlan, dopo sọn hẹnnu dopodopo mẹ, nado yì bẹ̀ aigba Kenani tọn pọ́n, yèdọ aigba he yẹn jlo na na Islaelivi lẹ.’ Enẹwutu, Mose de sunnu 12 bo dọna yé dọmọ: ‘Mì yì Kenani bo dindona eyin aigba lọ yọ́n na jinukun. Mì pọ́n eyin mẹhe to finẹ lẹ dohuhlọn kavi lala, podọ eyin gòhọ mẹ wẹ yé nọ nọ̀ kavi tòdaho lẹ mẹ.’ Amẹ́ 12 lẹ, he bẹ Jọṣua po Kalẹbi po hẹn, dedo Kenani.

To azán 40 godo, amẹ́ lọ lẹ lẹkọwa, bo hẹn ovò sinsẹ́n, pomeglanate po ovẹn sinsẹ́n lẹ po gọ̀. Amẹ́ lọ lẹ na linlin dọmọ: ‘Aigba dagbe de wẹ, amọ́ mẹhe to finẹ lẹ dohuhlọn podọ adó tòdaho yetọn lẹ tọn yiaga taun.’ Kalẹbi sọ dọmọ: ‘Mí gán gbawhàn yetọn. Mì gbọ mí ni dedo hadopo!’ Be a yọ́n nuhewutu Kalẹbi do dọ mọ ya? Na ewọ po Jọṣua po dejido Jehovah go wutu wẹ. Amọ́, amẹ́ ao he pò lẹ dọmọ: ‘Lala! Mẹhe to aigba lọ ji lẹ tọ́nalùn bo taidi asuka lẹ! Mí sọ taidi obọ̀ lẹ to nukọn yetọn.’

Islaelivi lẹ jẹflumẹ. Yé jẹ nuhlundọ ji bo dọna ode awetọ dọ: ‘Mì gbọ mí ni de nukọntọ devo bo lẹkọyi Egipti. Naegbọn mí nado yì dọ́n nado yin  hùhù?’ Jọṣua po Kalẹbi po dọmọ: ‘Mì ma vẹtolina Jehovah blo, mì masọ dibu blo. Jehovah na basi hihọ́na mí.’ Amọ́, Islaelivi lẹ ma jlo na dotoaina yé. Yé tlẹ jlo na hù Jọṣua po Kalẹbi po!

Etẹwẹ Jehovah wà? E dọna Mose dọmọ: ‘Mahopọnna nuhe n’ko wà na yé lẹpo, Islaelivi lẹ gbẹ́ to tolivẹ na mi. Enẹwutu, yé na nọ danfafa ehe ji na owhe 40, podọ finẹ wẹ yé na kú do. Ovi yetọn lẹ kẹdẹ gọna Jọṣua po Kalẹbi po wẹ na nọ aigba he n’dopagbe dọ n’na na yé lọ ji.’