Halin sa Bukid Sinai, ang mga Israelinhon nag-agi sa desyerto sang Paran pakadto sa lugar nga ginatawag Kades. Pag-abot didto, si Jehova nagsiling kay Moises: ‘Magpadala ka sing 12 ka lalaki, isa sa kada tribo, nga mangin espiya ukon manilag sa Canaan, ang duta nga ihatag ko sa mga Israelinhon.’ Nagpili si Moises sing 12 ka lalaki kag nagsiling sa ila: ‘Kadto kamo sa Canaan, kag tan-awa ninyo kon bala ang duta maayo tamnan. Tan-awa man ninyo kon ang mga tawo maluya ukon makusog, kag kon bala nagaistar sila sa mga tolda ukon sa mga siudad.’ Gani ang 12 ka espiya, lakip si Josue kag si Caleb, nagkadto sa Canaan.

Pagligad sang 40 ka adlaw, nagbalik ang mga espiya nga may dala nga mga prutas nga granada, igos, kag ubas. Ang mga espiya nagsiling: ‘Maayo gid ang duta, pero ang mga tawo didto makusog kag ang mga siudad may mataas nga mga pader.’ Pero si Caleb nagsiling: ‘Mapierde naton sila. Salakayon naton sila!’ Kabalo ka bala kon ngaa nasiling ina ni Caleb? Bangod nagsalig gid sila ni Josue kay Jehova. Pero ang napulo ka espiya nagsiling: ‘Indi! Daku ang mga tawo didto, daw mga higante! Daw mga tibakla lang kita kon ikumparar sa ila.’

Kinulbaan ang mga Israelinhon. Gani, nagreklamo sila kag nagsiling: ‘Mapili kita sang bag-o nga lider kag magbalik sa Egipto. Ngaa makadto kita sa sina nga lugar kon patyon man lang kita?’ Si Josue kag si Caleb nagsiling: ‘Indi kamo magrebelde kay Jehova, kag indi  kamo magkahadlok. Proteksionan kita ni Jehova.’ Pero wala namati ang mga Israelinhon. Gusto pa gani nila patyon si Josue kag si Caleb!

Ano ang ginhimo ni Jehova? Nagsiling sia kay Moises: ‘Pagkatapos sang tanan ko nga ginhimo sa mga Israelinhon, indi gihapon sila magtuman sa akon. Gani, magatener sila sa kamingawan sing 40 ka tuig, kag diri na sila mapatay. Ang mga bata lamang nila, upod kay Josue kag kay Caleb ang magaistar sa duta nga ginpromisa ko nga ihatag sa ila.’