Ovaisrael va za po pOndundu Sinai nave tuurunga okuti onguza kwaParan nga poruveze ndu isanewa Kades. Imbo Jehova wa hungira ku Moses a tja: ‘Hinda ovarumendu 12, umwe okuza momuhoko auhe, okukatara ehi raKanaan ndi me yandja kOvaisrael.’ Okutja Moses wa toorora ovarumendu 12 a tja ku wo: ‘Twendeye koKanaan mu katare kutja ehi ewa okukuna mo ovikurya. Katareye kutja ovandu mbo ovanamasa poo ovingundi nokutja ve kara mozondanda poo movihuro.’ Ovakonḓonone vehi 12, mu mwa ri Josua na Kaleb, va ya koKanaan.

Kombunda yomayuva 40, ovakonḓonone vehi va kotoka, ava eterere omakuyu, ozondenya nomandjembere. Owo va tja: ‘Oro ehi ewa, posiya ovandu ovanamasa nu ovihuro vya tungwa notumbo otunene.’ Okuzambo Kaleb wa tja: ‘Matu yenene okuvetaara. Ngatu yende uriri! Mo tjiwa kutja ongwaye Kaleb tja tja nao? Orondu eye na Josua va ri nongamburiro mu Jehova. Posiya ovakonḓonone vehi imba 10 va tja: ‘Kako! Ovandu koṋa ngo ovanene, tjimuna ovarenaka! Eṱe aatu munika tjimuna ozombahu meṋe yawo.’

Ovaisrael ve rihahizire. Owo va uta okuunauna amave tja kovakwao: ‘Ngatu pahe omuhongore warwe tu yaruke koEngipte. Ongwaye tji matu sokuyenda koṋa ngo tu kazepewe?’ Josua na Kaleb va tja: ‘Amu katuka komurungu waJehova nu amu tira, Jehova me tu  yama.’ Posiya Ovaisrael kaave puratene. Owo nandarire aave vanga okuzepa Josua na Kaleb!

Jehova wa tjita vi? Eye wa tja ku Moses: ‘Nakombanda yoviṋa avihe mbi mba tjitira Ovaisrael, owo ngunda kavena onḓuviro ku ami. Nambano mave kara mokuti onguza oure wozombura 40, nu omu mave kokere. Ovanatje vawo porwawo na Josua na Kaleb ombu mave katura mehi ndi mba kwizika okuyandja ku wo.’