Ebʼ laj Israel keʼelk chaq saʼ li tzuul Sinai. Xkohebʼ saʼ li chaqichʼochʼ Paran toj reetal naq keʼwulak saʼ li naʼaj Cades. Aran li Jehobʼa kixye re laj Moises: «Taqla 12 chi winq, jun re li junjunq chi teep, re rilbʼal chaq li tenamit Canaan, li chʼochʼ li tinkʼe rehebʼ laj Israel». Joʼkan naq laj Moises kixsikʼ 12 chi winq ut kixye rehebʼ: «Ayuqex Canaan ut ilomaq chaq ma chaabʼil li chʼochʼ re awk. Teeril ajwiʼ ma kawebʼ malaj inkʼaʼ kawebʼ ribʼ ebʼ li poyanam, ut ma wankebʼ saʼ tzʼuum malaj saʼ tzʼakil ochoch». Li 12 xkohebʼ Canaan. Saʼ xyanqebʼ wank laj Josue ut laj Caleb.

Ak xnumeʼk 40 kutan naq keʼsutqʼiik chaq ebʼ laj chʼuuk. Keʼxkʼam chaq hiig, granaad ut uubʼ, ut koleʼxye: «Chaabʼil li chʼochʼ aran Canaan, abʼan ebʼ li poyanam jwal kawebʼ ribʼ ut li xsuttzʼakil ebʼ li tenamit jwal najt xteramebʼ». Tojaʼ naq laj Caleb kixye: «Tooruuq xqʼaxbʼalebʼ ru! Yoʼqex anaqwan». Kʼaʼut nakaaye naq laj Caleb kixye aʼin? Xbʼaan naq aʼan ut laj Josue kʼojkʼokebʼ xchʼool rikʼin li Jehobʼa. Abʼan, li 10 chik keʼxye: «Mooxik. Jwal najt roqebʼ li poyanam aʼan. Chixkʼatqebʼ chanchano saakʼ malaj chiliʼ».

Ebʼ laj Israel keʼchʼinaak xchʼool, keʼok chi wechʼok ut xyeebʼal chiribʼilebʼ ribʼ: «Qasikʼaq junaq chik aj kʼamolbʼe ut sutqʼiqo Egipto. Kʼaru aj e naq tooxik Canaan? Ma re kamk?». Laj Josue ut laj Caleb keʼxye: «Qapaabʼaq  re li Jehobʼa. Aʼan tkoloq qe. Mexxuwak». Abʼan ebʼ laj Israel inkʼaʼ xeʼabʼink chiruhebʼ. Keʼraj bʼan xkamsinkil laj Josue ut laj Caleb.

Ut kʼaru kixbʼaanu li Jehobʼa? Kixye re laj Moises: «Ak naabʼal li chaabʼil naʼlebʼ xinbʼaanu rehebʼ laj Israel, abʼan inkʼaʼ nekeʼraj abʼink. Joʼkan naq, tinkanabʼebʼ 40 chihabʼ saʼ li chaqichʼochʼ aʼin toj saʼ xkamikebʼ. Kaʼajwiʼ ebʼ li ralal xkʼajol, ut laj Josue ut laj Caleb, teʼwanq saʼ li chʼochʼ li xinyeechiʼi rehebʼ laj Israel».