Aisiraeli nĩ moimire Kĩrĩma-inĩ gĩa Sinai na makĩgera werũ-inĩ wa Parani nginya magĩkinya handũ heetagwo Kadeshi. Marĩ kũu Jehova nĩ eerire Musa ũũ: ‘Tũma arũme 12 kuuma mĩhĩrĩga-inĩ yothe ya Isiraeli nĩguo mathiĩ magatuĩrie bũrũri wa Kanaani tondũ nĩguo ngũmahe.’ Nĩ ũndũ ũcio Musa agĩthuura andũ 12 na akĩmeera ũũ: ‘Thiĩi bũrũri wa Kanaani mũtuĩrie kana nĩ mwega wa kũrĩmwo. Tuĩriai kana andũ acio marĩ na hinya gũtũkĩra, na mũmenye kũrĩa maikaraga.’ Atuĩria acio 12 arĩa nĩ hamwe na Joshua na Kalebu nĩ maambĩrĩirie rũgendo merekeire Kanaani.

Thutha wa thikũ 40, nĩ maacokire na ngũyũ, makomamanga, na thabibũ. Andũ acio moigire ũũ macoka: ‘Nĩ bũrũri mwega, no andũ a kũu marĩ na hinya na matũũra mao mairigĩtwo na thingo ndaihu.’ Nake Kalebu akiuga ũũ: ‘No tũmatoorie. Rekei tũthiĩ o rĩu!’ Hihi nĩ ũĩ kĩrĩa gĩatũmire Kalebu oige ũguo? Nĩ tondũ we na Joshua nĩ meehokete Jehova. No andũ acio angĩ 10 moigire ũũ: ‘Aca tũtigũthiĩ, tondũ andũ acio nĩ anene na maigana marimũ! Tũreyonaga tũigana itono tweringithania nao.’

Aisiraeli nĩ maakuire ngoro mũno. Maambĩrĩirie gũteta makĩĩranaga ũũ: ‘Nĩ tũthuure mũndũ ũngĩ wa gũtũtongoria nĩguo tũcoke Misiri. Nĩ kĩĩ gĩgũtũma tũthiĩ bũrũri ũcio  tũkoragũo?’ Joshua na Kalebu maamerire ũũ: ‘Mũtikametigĩre, kana mũremere Jehova. Nĩ egũtũgitĩra.’ No Aisiraeli matiendaga gũthikĩrĩria. O na meendaga kũũraga Joshua na Kalebu!

Jehova eekire atĩa? Eerire Musa ũũ: ‘O na thutha wa gwĩkĩra Aisiraeli maũndũ maingĩ ũguo, matiranjathĩkĩra. Nĩ ũndũ ũcio megũtũũra werũ-inĩ mĩaka 40, na nokuo magakuĩra. Ciana ciao, o hamwe na Joshua na Kalebu no o tu magaatũũra thĩinĩ wa bũrũri ũrĩa ndaamerĩire.’