Ovaisrael ova li va dja po pomhunda yaSinai ndele tava tavakana mombuwa yaParan va yuka konhele hai ifanwa Kades. Fimbo va li opo, Jehova okwa li a lombwela Moses a ti: ‘Tuma ovalumenhu 12, va dja momapata aeshe, va ka lave Kanaan, edu olo handi ka pa Ovaisrael.’ Opo nee Moses okwa hoolola ovalumenhu 12, ndele te va lombwele ta ti: ‘Indeni kuKanaan mu ka tale ngeenge edu ohali mene oikulya. Taleni ngeenge ovanhu ove na eenghono ile kave na sha nosho yo kutya ohava kala meetenda ile omoilando.’ Eendadi 12, mwa kwatela Josua naKaleb, oda li da ya kuKanaan.

Eendadi oda li da aluka konima yomafiku 40, da etelela eenghwiyu, eegranati nosho yo omandjebele. Oda li da lombwela oshiwana da ti: ‘Edu oliwa, ashike ovanhu ovanaenghono noilando oi na omakuma male.’ Opo nee Kaleb okwa ti: ‘Ohatu dulu oku va finda, natu yeni ashike paife!’ Mbela ou shii kutya omolwashike Kaleb a li a popya ngaho? Omolwaashi ye naJosua ova li ve lineekela Jehova. Ashike eendadi dikwao omulongo oda ti: ‘Hasho, ovanhu vokuKanaan ovanene, va fa ovatongolume. Fye otwa li ashike twa fa oshipaxu eshi tu li puvo.’

Ovaisrael ova li va teka omukumo, ndele tava hovele okungongota nokulombwelafana tava ti: ‘Natu hoololeni omuwiliki umwe ndele hatu shuneni kuEgipti. Omolwashike tu na okuya kedu oko tu ka dipawe?’  Josua naKaleb ova ti: ‘Inamu dina elombwelo laJehova, nye inamu tila. Jehova ote ke tu amena.’ Ashike Ovaisrael kava li va pwilikina. Ova li nokuli va hala okudipaa Josua naKaleb.

Mbela Jehova okwa li a ninga po shike? Okwa li a lombwela Moses a ti: ‘Nonande onda ningila Ovaisrael oinima ihapu, natango inava hala okudulika kwaame. Paife otava ka kala mombuwa oule womido 40 notava ka fila mo. Ovana vavo nosho yo Josua naKaleb ovo ashike tava ka kala medu olo nde va udanekela.’