Abaisraeli mubalhua ahali Kithwe Sinai bamalhaba omo mbwarara eye Parani erihika omwa kitsweka ekikahulhawa mwa Kadesi. Eyo, Yehova mwabwira Musa athi: ‘Wuthume abalhume 12, erilhua omwa buli kihanda, eriyalinga ekihugho kye Kanana, ekya ngend’iha Abaisraeli.’ Neryo Musa mwasombolha abalhume 12 n’eribabwira athi: ‘Mughende e Kanana, mwanayalebya nga nina kihugho ekyuwene ekyangabya mw’ebyalya. Mulebaye abandu b’eyo nga banawithe amani kutse eyihi kandi nga bikere omo syohema kutse omwa syotawuni.’ Abalingyi 12, imwamuli Yosua na Kalebu, mubaya e Kanana.

Habere hahwa biro 40, abalingyi mubasubulha, bamasa n’ebighuma by’ebinyu, amakomamanga, n’eby’emithini. Abalingyi mubathulhagho bathi: ‘Ni kihugho ekyuwene, aliwe abandu b’eyo bawithe amani n’esyotawuni syabu siwithe mbimbo nyiri-nyiri.’ Neryo Kalebu mwabugha athi: ‘Thwangana basinga. Thughende n’esaha eno!’ Wunasi ekyaleka Kalebu iniabugha ebyo? Kundi iyo na Yosua babya bayikethere Yehova. Aliwe abandi balingyi ikumi mubabugha bathi: ‘Eyihi! Abandu b’eyo ni bali-bali kutsibu, bawithe amaaka! Muthwabere ng’emisyenene embere syabu.’

Abaisraeli mubahwa amani. Mubatsuka eriyineghenia n’eribwirana bathi: ‘Thusombole owundi musondoli, thwanasuba e Misiri. Busana  naki ithwaghenda omwa kihugho ekyo eriyakwa?’ Yosua na Kalebu mubabugha bathi: ‘Simuyisamambule oku Yehova, simubahe. Yehova akendi thutheya.’ Aliwe Abaisraeli isibanga hulikirira. Nibya mubanza n’eritha Yosua na Kalebu!

Yehova mwakolhaki? Mwabwira Musa athi: ‘Abaisraeli abanabirikolera ebindu bingaha, na hathya bakaghana erinyowa. Busana n’ekyo bakendi syaghanga-ghanga omo mbwarara ahabw’emyaka 40, n’eriholeramu. Abaana babu basa na Yosua na Kalebu ba bakendi syingira omwa kihugho nalhaghabo eribaha.’