Di Izrɛlayt dɛn lɛf Mawnt Saynay, ɛn dɛn pas na wan dɛzat we dɛn kɔl Paran fɔ go na Kedɛsh. Na de Jiova tɛl Mozis se: ‘Pik 12 man dɛn frɔm di 12 trayb dɛn na Izrɛl fɔ go si aw Kenan tan, di land we a go gi to di Izrɛlayt dɛn. So Mozis pik 12 man dɛn ɛn tɛl dɛn se: ‘Una go na Kenan ɛn una luk if di land fayn fɔ plant. Una luk if di pipul dɛn wik ɔ dɛn gɛt trɛnk ɛn if dɛn de liv na tɛnt dɛn ɔ na siti dɛn.’ Jɔshwa ɛn Kelɛb bin de pat pan di 12 man dɛn we bin lɛf fɔ go si aw Kenan tan.

Afta 40 dez, di man dɛn we bin go luk di land bin kam bak, ɛn dɛn kam wit fig, pɔmigranet, ɛn greps dɛn. Di man dɛn we bin go luk di land bin tɔk se: ‘Na gud land bɔt di pipul dɛn gɛt trɛnk ɛn di siti dɛn gɛt ay ay wɔl dɛn.’ Dɔn Kelɛb tɔk se: ‘Wi go ebul fɔ win dɛn. Mek wi go wantɛm wantɛm!’ Yu sabi wetin mek Kelɛb bin tɔk so? Na bikɔs in ɛn Jɔshwa bin abop pan Jiova. Bɔt di ɔda tɛn man dɛn we bin go luk di land bin tɔk se: ‘Nɔ! Di pipul dɛn we de de big lɛk jayant! Wi fiba lɛk grasɔpa dɛn to dɛn.’

Di Izrɛlayt dɛn at bin pwɛl. Dɛn bigin fɔ grɔmbul ɛn tɔk to dɛnsɛf se: ‘Lɛ wi pik ɔda lida we go kɛr wi go bak na Ijipt. Wetin mek wi fɔ go na dis ples fɔ mek dɛn kil wi? Jɔshwa ɛn Kelɛb tɛl  dɛn se: ‘Una nɔ du wetin Jiova nɔ want, ɛn una nɔ fred. Jiova go protɛkt wi.’ Bɔt di Izrɛlayt dɛn nɔ bin lisin. Dɛn bin ivin want fɔ kil Jɔshwa ɛn Kelɛb!

Wetin Jiova bin du? I bin tɛl Mozis se: ‘Pan ɔl wetin a dɔn du fɔ di Izrɛlayt dɛn, dɛn stil nɔ de du wetin a want. So dɛn go de na di wildanɛs fɔ 40 ia ɛn na de dɛn go day. Na dɛn pikin dɛn nɔmɔ wit Jɔshwa ɛn Kelɛb go de na di land we a dɔn prɔmis fɔ gi una.’