Mɛɛ Isɔluɛiya faŋaŋ o Pembii Sainaive, ma keeku o yondo pollo niŋ Paluaŋ, ma kua o fanda pilɛ diolaŋ aa Kadɛsi. Loŋ Chɛhowa dimul Muuse ni aa: ‘Hɛli puaa 12, wana pilɛ o kaale kɛ kɛ niŋ, ma vem nda le ma kɔ mɛɛndaŋ lɛŋnde Kenaŋndeŋ. Lɛŋnde leŋ ya cho Isɔluɛiya ke ni.’ Okoŋ mi Muuse hɛli puaa 12, mbo dimul nda aa: ‘La kɔ Kenaŋ, mi la kɔ mɛɛndaŋ te lɛŋnde leŋ le cho pɛ le kɛndɛ le tɔlɔɔlaŋ. La kɔ tofa te wanaa cho loŋ nda cho pɛ wanaa siɛlɛi ɔɔ wanaa dialuŋ kala. Nduyɛ mi la tofa te o tɛndiilaŋ niŋ nda lɔl ni ɔɔ te o chieeŋ bɛndoŋ niŋ ni.’ Mi suaŋ suaŋaa 12 haa mal le kɔlaŋ Kenaŋ. Nduyɛ Chɔɔsuaa nda Kelɛbi wa nda tɛɛŋ.

Mɛɛ nda kɔ chii palɛi 40, mi suaŋ suaŋnda haa miiŋgu a fikiiyaŋ, pɔmɛkilanetiiyaŋ, a kilepiiyaŋ o ba. Ma duaunuŋ kona aa: ‘Lɛŋnde leŋ le naŋ bɔɔ. Kɛ wanaa cho loŋ nda a nɔ bɔɔ dialuŋ kalaŋ. Nduyɛ chieeŋ ndaŋ cho ŋ balaa a kpakila vilɛi vilɛilaŋ.’ Okoŋ mi Kelɛbi dimi aa: ‘Ŋ tiuba miŋ yem nda. Ŋ kɔŋnuŋ suŋ suŋ.’ A sina le sabu Kelɛbi dimi lende wo? Kanifuule, Kelɛbi nda Chɔɔsuaa ndaa tiindaŋ o Chɛhowa niŋ. Kɛ mi suaŋ suaŋnda a piliaa dimi aa: ‘Ɛ ɛ. Wanaa cho loŋ nda a chelul bɔɔ. Nduyɛ a hiou naa yoomuaŋ poloŋ. Ŋ cho ko maa kamballa le nda.’

Mi Isɔluɛiya tambu kɔl. Ma kandu ŋɔɔchiaŋndo, nduyɛ ma dimulaŋ aa: ‘La ŋ hɛliŋ wana cheleŋ mbo sim naa lachi, miŋ miiŋguŋ Ichipi. Le yɛɛ naŋ kɔ yɛ o fondaŋ koŋ ma kɔ diu diu naa?’ Mi Chɔɔsuaa nda Kelɛbi dimul  nda aa: ‘La yɔŋ isiooŋ mi la kɛɛ le Chɛhowa diomndo tueiyɔɔ le. Chɛhowa cho naa manda.’ Kɛ mi Isɔluɛiya kɛɛ le nda nilaŋ yaŋɔɔ. Ma yeema pɛŋ le Chɔɔsuaa nda Kelɛbi diyɔɔ!

Yɛɛ Chɛhowa ndoo tosa yɛ? Mbo dimul Muuse aa: ‘I bii niŋ sɔɔŋ tosaa tau le Isɔluɛiya. Kɛ a tui ya diom te. Lelaŋ, a cho wa o yondo pollo hoo niŋ le wɔsilaŋ 40. Nduyɛ naŋnuŋ nda cho lo ni, mi nda kpou vi. Mɛɛ chuauwaa ndaa, Chɔɔsuaa a Kelɛbi ma kuɛ o lɛŋnde ya dimi le nya kioo leŋ niŋ.’