တၢ်မၤလိ ၂၆
ပှၤကွၢ်ဟုၣ်တၢ်တဆံခံဂၤ
ပှၤအံၣ်စရ့လးဖိတဖၣ် ဟးထီၣ်ကွံာ်ဝဲလၢကစၢၢ်စံၤနါ ဒီးလဲၤခီဂာ်ဝဲပှၢ်မုၢ်ကနၢပၤရၣ်လီၤ. အဝဲသ့ၣ်လဲၤဝဲဆူ တၢ်လီၢ်ကိးဝဲအမံၤလၢ ကၤဒ့ၣ်လီၤ. ဖဲန့ၣ်န့ၣ် ယဟိဝၤယွၤတဲဘၣ်စီၤမိၤၡ့လၢ– ‘ဃုထၢထီၣ်ပှၤကွၢ်ဟုၣ်တၢ် ၁၂ ဂၤလၢ ပှၤအံၣ်စရ့လးဖိတဒူၣ်စုာ်စုာ်အကျါဒီး မၢအဝဲသ့ၣ်လဲၤကွၢ်ဟုၣ် ကီၢ်ကနၤဧၣ်တက့ၢ်. အဝဲသ့ၣ်ကဘၣ်လဲၤကွၢ်ဟုၣ်ဝဲ ကီၢ်ကနၤဧၣ်လၢ ယကဟ့ၣ်လီၤပှၤအံၣ်စရ့လးဖိန့ၣ်လီၤ.’ အဃိ စီၤမိၤၡ့ဃုထၢထီၣ်ဝဲ ပှၤ ၁၂ ဂၤ ဒီးတဲဘၣ်အဝဲသ့ၣ်လၢ– ‘လဲၤဆူကီၢ်ကနၤဧၣ် ဒီးဃုသ့ၣ်ညါ ပှၤအိၣ်ဖဲန့ၣ်တဖၣ် အတၢ်အိၣ်သးတက့ၢ်. ဒီးတၢ်လီၢ်အဝဲန့ၣ် မ့ၢ်အဂ့ၤလၢ တၢ်သူၣ်အီၣ်ဖျးအီၣ်တၢ်အဂီၢ်ဧါ. ဒီးပှၤအိၣ်ဖဲန့ၣ်တဖၣ် မ့ၢ်ပှၤလၢအဂံၢ်အဘါဆူၣ် မ့တမ့ၢ် အဂံၢ်စၢ်ဘါစၢ်ဧါ. ဒီးမ့ၢ်အဝဲသ့ၣ်အိၣ်လၢဒဲ မ့တမ့ၢ် လၢဝ့ၢ်ပူၤစ့ၢ်ကီးဧါ.’ ပှၤကွၢ်ဟုၣ်တၢ် ၁၂ ဂၤန့ၣ် ပၣ်ဃုာ်ဝဲဒီး စီၤယိၤၡူဒီးစီၤကၤလ့းလီၤ. အဝဲသ့ၣ်လဲၤဝဲလၢ ကီၢ်ကနၤဧၣ်လီၤ.
ဖဲအသီ ၄၀ ပူၤကွံာ်ဝံၤအလီၢ်ခံ ပှၤကွၢ်ဟုၣ်တၢ်တဖၣ်ဟဲက့ၤဝဲလီၤ. အဝဲသ့ၣ်ဟဲက့ၤစိာ်ဝဲ ချၢၣ်ဒၢသၣ်, သလဲသၣ် ဒီးစပံးသၣ်တဖၣ်လီၤ. ပှၤကွၢ်ဟုၣ်တၢ်တဖၣ်အံၤ တဲဝဲလၢ– ‘ကီၢ်ကနၤဧၣ်န့ၣ် မ့ၢ်ဝဲတၢ်လီၢ်လၢအဂ့ၤ. ဘၣ်ဆၣ် ပှၤအိၣ်ဖဲန့ၣ်တဖၣ် အဂံၢ်ဆူၣ်ဘါဆူၣ်ဝဲ ဒီးအဝဲသ့ၣ်အဝ့ၢ်ခိၣ်ဒူန့ၣ် ထီဝဲလီၤ.’ ဝံၤဒီး စီၤကၤလ့းတဲဝဲလၢ– ‘ပဒုးနၢၤအဝဲသ့ၣ်သ့ဒီး ပကလဲၤဒုးအဝဲသ့ၣ်ခဲအံၤလီၤ.’ ဘၣ်မနုၤအဃိ စီၤကၤလ့းတဲဝဲဒ်အံၤလဲၣ်. ခီဖျိလၢ အဝဲဒီးစီၤယိၤၡူန့ၣ် အိၣ်ဒီးတၢ်နာ်ယဟိဝၤယွၤအဃိလီၤ. မ့မ့ၢ်ပှၤကွၢ်ဟုၣ်တၢ်အဂၤတဆံန့ၣ် တဲဝဲလၢ– ‘ပတကြၢးလဲၤဒုးပှၤကနၤဧၣ်ဖိဘၣ်. အဝဲသ့ၣ်မ့ၢ်ပှၤဖးဒိၣ်ဖးထီ လီၤဂာ်ဒ်သိးဒီးဒိးတကါတဖၣ်လီၤ. မ့မ့ၢ်ပဝဲန့ၣ် ပလီၤဂာ်ဒ်ဒွဲၣ်ဧိၤတြၤဧိၤလၢ အဝဲသ့ၣ်အခီၣ်ထံးလီၤ.’
ဖဲပှၤအံၣ်စရ့လးဖိတဖၣ် နၢ်ဟူဘၣ်တၢ်ကစီၣ်အံၤအခါ အဝဲသ့ၣ်သးဟးဂီၤဝဲလီၤ. အဝဲသ့ၣ်စးထီၣ်ကဒူးကဒ့ၣ်တၢ်ဒီး တဲလိာ်အသးလၢ– ‘ပကဃုထၢထီၣ်ခိၣ်နၢ်လၢ အသီတဂၤဒီး ပကက့ၤဆူကီၢ်အဲၤကူပတူးအပူၤလီၤ. ဘၣ်မနုၤအဃိ ပဘၣ်လဲၤဒိးသံလီၤပသးလၢ တၢ်လီၢ်ဖဲန့ၣ်လဲၣ်.’ စီၤယိၤၡူဒီးစီၤကၤလ့း တဲဝဲလၢ– ‘ဒိကနၣ်ယဟိဝၤယွၤအကလုၢ် ဒီးတဘၣ်ပျံၤတၢ်တဂ့ၤ. ယဟိဝၤယွၤကဒီသဒၢပှၤလီၤ.’ ဘၣ်ဆၣ် ပှၤအံၣ်စရ့လးဖိတဖၣ် တဒိကနၣ် အဝဲသ့ၣ်အကလုၢ်ဘၣ်. လၢတၢ်န့ၣ်အလီၢ် ပှၤအံၣ်စရ့လးဖိတဖၣ် အဲၣ်ဒိးမၤသံဝဲ စီၤယိၤၡူဒီးစီၤကၤလ့းလီၤ.
ယဟိဝၤယွၤမၤဝဲဒ်လဲၣ်. အဝဲတဲဘၣ်စီၤမိၤၡ့လၢ– ‘ယမၤန့ၢ်တၢ်လၢ ပှၤအံၣ်စရ့လးဖိတဖၣ်အဂီၢ်အါမး ဘၣ်ဆၣ် အဝဲသ့ၣ်တဒိကနၣ်ယကလုၢ်ဒံးဘၣ်. အဃိ အဝဲသ့ၣ်ကဘၣ်အိၣ်လၢ ပှၢ်မုၢ်ကနၢအပူၤအနံၣ် ၄၀ ဒီးအဝဲသ့ၣ်ကသံဝဲဖဲန့ၣ်လီၤ. ထဲဒၣ်အဝဲသ့ၣ်အဖိအလံၤ, စီၤယိၤၡူဒီးစီၤကၤလ့းန့ၣ် ကလဲၤနုာ်လီၤဘၣ်ဆူ ကီၢ်တၢ်စံးပာ်အပူၤလီၤ.’
“ပှၤနာ်တၢ်စှၤသ့ၣ်ဧၢ, ဘၣ်မနုၤလၢ သုပျံၤတၢ်လဲၣ်.”—မးသဲ ၈:၂၆
တၢ်ဂ့ၤအဂၤလၢ နကဘၣ်သး
လံာ်စီဆှံအံၤ အတၢ်ကစီၣ် မ့ၢ်မနုၤလဲၣ်
ပှၤအံၣ်စရ့လးဖိတဖၣ် နုာ်လီၤဆူ ကီၢ်ကနၣ်ဧၣ်
ဘၣ်မနုာ်အဃိ ယဟိဝၤယွၤပာ်လီၤတဲာ် နီၢ်ရၤဃးဒီးအဟံၣ်ဖိဃီဖိလၢ ဝ့ၢ်ယရံၤဃိအပူၤ ဖဲပှၤအံၣ်စရ့လးဖိတဖၣ် နုာ်လီၤဆူကီၢ်ကနၣ်ဧၣ်အဆၢကတီၢ်လဲၣ်
