Maisilaele basiya Lilundu la Sinai mi bafita mwa lihalaupa la Parani mi baliba kwa sibaka sesibizwa Kadeshi. Teñi ko, Jehova abulelela Mushe kuli: ‘Luma baana ba 12, alimuñwi mwa lusika ni lusika, kuli bayo twela naha ya Kanana, ili naha yenikafa Maisilaele.’ Kacwalo, Mushe aketa baana ba 12, mi ali ku bona: ‘Muye kwa naha ya Kanana, mi muyo bona haiba kwakonahala kulima mwateñi lico. Muyo bona haiba batu babapila mwateñi ki babafokola kamba ki babamaata, ni kuli bapila mwa litende kamba mwa mileneñi.’ Matwela ba 12, kukopanyeleza Joshua ni Kalebu baya kwa naha ya Kanana.

Hamulaho wa mazazi a 40, bakuta inze bashimbile lifeiga, lipomegaraneti, ni veine. Matwela babiha kuli: ‘Ki naha yende kono batu babapila mwateñi ki babamaata mi mileneñi yabona inani mamota amatelele hahulu.’ Mi Kalebu ali: ‘Lwakona kubatula. Haluyeñi kapili-pili!’ Kana mwaziba libaka Kalebu hanaabulezi cwalo? Kakuli yena ni Joshua nebasepile Jehova. Kono matwela baalishumi nebabulezi kuli: ‘Batili! Batu ba mwateñi ki babatuna hahulu, sina makwenyepa! Neluipona sina limbimba haluibapanya ku bona.’

Maisilaele nebazwafile. Bakala kubilaela inze babulelisana bali: ‘Haluiketeleñi mueteleli usili mi lukutele kwa Egepita. Ki kabakalañi  haluswanela kuya kwa sibaka se kuli luyo bulaiwa?’ Joshua ni Kalebu bali: ‘Musike mwakwenuhela Jehova, mi musike mwasaba. Jehova uka lusileleza.’ Kono Maisilaele nebasika teeleza. Mane nebabata kubulaya Joshua ni Kalebu!

Ki lika mañi zanaaezize Jehova? Kihaa li ku Mushe: ‘Hamulaho wa kubaezeza lika kaufela zeni baezelize, habalati kuniutwa. Kacwalo, bakaina mwa lihalaupa ka lilimo ze 40 mi nika babulaela mwateñi. Ki bana feela babona, ni Joshua ni Kalebu babaka pila mwa naha yenibasepisize kubafa.’