VaIsaleli va sile Muncinda ua Sinayi, kaha vandele mu ndinda ya Palane na ku Kandese. Mu va heteleko, Yehova ua lekele Mosesa ngueni: ‘Tuma vamala 12, hangula umo ku nkala muyati, linga va ka nenge cifuti ca Kanana ci nji ka hana ku vaIsaleli.’ Ngeci Mosesa ua hanguile vamala 12, na ku va leka ngueni: ‘Yenu ku Kanana mu ka mone nga livu liaco lili na vuilo vua ku ima vimbuto, na ku tala nga vantu va kalako va ngolo ni kuahi, kaha nga va kala mu vimbalaka ni mu vimbonge.’ Vaze vamala 12 va ile ku Kanana, umo uavo Yehosua mukuavo Kaleve.

Mu nima ya matangua 40, va hilukilemo, vezile na vinkuyu, vilomasi na vusuka vua ku miti ya viniu. Kaha va handekele nguavo: ‘Cifuti caco ca cili, vunoni vantu va kalako va ngolo, kaha vimbonge viavo via kala na mu vivumbe via laha.’ Vunoni Kaleve ua handekele ngueni: ‘Tu ka va vula. Tu yenuko hano vene!’ Ua tantekeya vika Kaleve ua handekele ngoco ni? Muomu neni na Yehosua va kulahelele muli Yehova. Vunoni vandondzi vakuavo likumi va handekele nguavo: ‘Houe, vantu va kalako va ku tuntuka ngue makisikisi! Etu ku tu tala ngue tu vambimba.’

Aa mezi a zeyesele vaIsaleli. Va putukile ku tatuoka na ku lileka umo na mukuavo, nguavo: ‘Tu hangulenu ntuamena ueka linga tu hiluke ku Ingito. Vika tu ila ku cihela caco linga va ka tu tsihileko?’  Vunoni Yehosua na Kaleve, nguavo: ‘Kati mu muese lisino kuli Yehova, kaha kati mu ivue vuoma. Yehova a ka tu niunga.’ Vutuhu ngoco, vaIsaleli ka va halakanene. Va tondele ku tsiha Yehosua na Kaleve!

Vati ua lingile Yehova? Ua lekele Mosesa ngueni: ‘Viose vi nji na lingila vaIsaleli nkuma via ngoco, kasi va na viana ku ononoka. Ngeci mukemuo, va ka endangana mu ndinda miaka 40, noho ha va ka tsila. Vunoni vana vavo na Yehosua na Kaleve vakevo lika va ka yoyela mu cifuti ci nja va kulahesa.’