Kema israeleuanij kistejkej ipan tepetl Sinaí, nejnenkej ipan nopa uaktok tlali Parán, uan asitoj ipan se tlali tlen itokayaya Cadés. Nopaya Jehová kiiljuik Moisés: “Xikintlapejpeni 12 tlakamej, se tlen sejse ueyi familia, uan xikintitlani ma tlachiatij Canaán, nopa tlali tlen nikinmakas israeleuanij”. Uajka Moisés kintlapejpenik 12 tlakamej uan kiniljuik: “Xiakaj Canaán uan xikitakaj tlaj kena tlaeli ipan nopa tlali. Xikitakaj tlaj nopa tlakamej tejtetikej o amo, uan tlaj moyaualojtokej ika tepamitl o san tlapojtok nopa altepemej kampa itstokej”. Uajka nopa tlakamej yajkej Canaán, Josué uan Caleb nojkia yauiyayaj.

Nopa tlakamej tlakuepilijkej kema ya panotoya 40 tonali. Kiualikakej higos, granadas uan uvas. Inijuantij kiijtojkej: “Maske ipan Canaán nopa tlali kuali temaka itlajka, nopa tlakamej katli nopaya itstokej tlauel tejtetikej, uan nopa altepemej kuali moyaualojtokej ika uejkapantik tepamitl”. Uajka Caleb kiijtok: “¡Uelis tikintlanisej! Ma tiakaj”. ¿Kenke Caleb kiijtok nopa? Pampa ya uan Josué motemachiyayaj ipan Jehová. Uan nopa sekinok matlaktli tlakamej, kiijtojkej: “¡Amo! ¡Nopa maseualmej tlauel uejkapantikej! Inijuantij techitaj keja tieliskiaj tichapolimej”.

Israeleuanij tlauel momajmatijkej uan pejkej kiijilnamikij Moisés, kiijtojkej: “Ma tijtlapejpenikaj seyok katli techyakanas uan ma titlakuepilikaj Egipto. ¿Tlake tijchiuatij Canaán? Tlaj tiasej, san  techmiktisej”. Uajka Josué uan Caleb kiniljuijkej: “Ma tijneltokakaj Jehová. Amo ximajmauikaj. Jehová techmanauis”. Israeleuanij amo kintlakakilijkej uan kinekiyayaj kimiktisej Josué uan Caleb.

¿Tlake kichijki Jehová? Ya kiiljuik Moisés: “Maske tlauel nikinpaleuijtok israeleuanij, inijuantij amo nechneltokaj. Yeka, nikinkauas ma itstokaj 40 xiuitl ipan ni uaktok tlali, uan nikaj mikisej. San Josué, Caleb uan ininkoneuaj ni maseualmej kalakisej ipan nopa tlali tlen nikiniljuik nikinmakaskia”.