Ízrel dineʼé Dził Sáínaidę́ę́ʼ dashdiiná dóó Kéídesh hoolyéedi jiníná. Jiihóvah éí Mózes kwííłní: ‘Diné naakitsʼáadah dadíłʼáago Kéínan kéyah hadeidoosił; éí Ízrel dineʼé baa dinishʼaah.’ Mózes naakitsʼáadah diné náyiizlááʼ dóó yidííniid: ‘Kéínan bíidoohkah, chʼiyáán yáʼátʼéehgo ndaniseʼ daatsʼí. Diné dabidziil daatsʼí, ndi dooda daatsʼí, yiiʼ kéédahatʼı̨́; níbaal daatsʼí yiiʼ dabighan, doodaiiʼ kin hadaasʼáii bidziilgo bináʼástłʼingo daatsʼí yiiʼ kéédahatʼı̨́. Naakitsʼáadah kéyah hadeidoosiłígíí, Jáshowa dóó Kéíleb bitahdi, Kéínan kéyahgóó dah diikai.

Dízdiin yiską́ąjįʼ tʼą́ą́ʼ níjíkai, áádę́ę́ʼ pámgrenit bineestʼąʼ dóó fig bineestʼąʼ índa chʼil naʼatłʼoʼii bitsʼáozʼaʼ bineestʼąʼ ałdóʼ nidadzizyı̨́. Kéyah hadeidoosiłígíí ádajiní: ‘Éí kéyah yáʼáhootʼéehgi hazʼą́ą́ lá, ndi diné dabidziil dóó dabighan bidziilgo bináʼástłʼingo kéédahatʼı̨́.’ Ńtʼééʼ Kéíleb ání: ‘Tįʼ, tʼáá kʼad ákóde hidiikahgo éí bikʼeh dadidiidleełígíí bídeíníigah.’ Haʼátʼíísh biniinaa Kéíleb ákódííniid? Jó, bí dóó Jáshowa Jiihóvah yaa dzólí. Ndi náánáłaʼ hadeidoosiłígíí ádadííniid: ‘Dooda! Díí diné nihiláahgo ayóó ádaníłnééz lá! Áko binááł nahachagiigi ádaniitʼé.’

Ízrel dineʼé tʼáá ałtso yéigo hahodííłdláád. Ízrel dineʼé saad dahasłı̨́įʼgo ádahodííniid: ‘Nihinanitʼaʼí łaʼ nidadiiltéełgo Ííjipgóó hániʼdii nihéénihidooʼish.’ Haʼátʼíísh biniyé Kéínangóó nídiikah,  tʼóó nanihíʼdidóóltsił?’ Jáshowa dóó Kéíleb kóní: ‘Jiihóvah bikʼeh honółʼı̨́, dóó tʼáadoo bikʼee nihił daayéʼí. Jiihóvah nihił hólǫ́.’ Ndi Ízrel dineʼé doo daʼíistsʼą́ąʼ da. Jáshowa dóó Kéíleb nidahodiiltsił danízin!

Jiihóvah haidzaa? Éí Mózes ííłní: ‘Tʼáá áłahjįʼ Ízrel dineʼé bíká anáshwoʼ ndi tʼahdii doo shikʼeh dahółʼı̨́į da. Áko honoojíidi dízdiin hwéédááhaigo biiʼ nidajikai doo áádóó dazhdínóonééł. Ízrel dineʼé łaʼ badaʼáłchíní índa Jáshowa dóó Kéíleb tʼéiyá díí kéyah biiʼ kéédahatʼı̨́į doo.