Ova Isilayeli vatunda Komphunda Sinai avaende moluhandya. Etyi vehika komphangu itiwa Kade, Jeova apopila Moisesi okuti: ‘Tuma ovalume 12, kese umwe atunde momuhoko wike, vakalave otyilongo tyo Kanaa. Otyilongo otyo mandyityiavela ova Isilayeli.’ Moisesi aholovona ovalume 12 evepopila okuti: ‘Endei ko Kanaa, katalei inkha otyilongo tyiyela ovikuna. Katalei inkha ovanthu vakalamo ovanene ine ovatutu tupu talei oñgeni omapunda-umbo avo ekahi.’ Povalavi 12 vaile ko Kanaa vamwe puvo o Josue na Kalebe.

Etyi palamba ononthiki 40, ovalavi avakondoka avaeta ovinyango vitiwa omakuyu nomapungu ovindele. Ovalavi avapopi okuti: ‘Otyilongo tyikahi nawa, mahi ovanthu vatyo ovanene unene iya epundaumbo lina ovimato viaya peulu.’ Konyima Kalebe apopi okuti: ‘Mahi onthue tupondola okuvefinda. Tuendeiko pehepano!’ Ove utyii omokonda yatyi Kalebe apopila ngotyo? Omokonda Kalebe na Josue ankho vayumba onthumbi mu Jeova. Mahi ovalavi ovakuavo 10 avapopi okuti: ‘Au! Ovanthu ovo ovanene unene, vekahi ngomakihi! Ponthele yavo tukala ngo vimphunia.’

Ova Isilayeli avatili owoma. Avahimbika okulipopila okuti: ‘Tuholovonei onkhalamutwe onkhuavo itukondole ko Egitu. Omokonda yatyi tuila kotyilongo otyo opo tukaipawe?’ Josue na Kalebe avapopi  okuti: ‘Tutavelei ku Jeova, tuahatilei owoma. Jeova metuyakulila.’ Mahi ova Isilayeli avehetavela. Ankho vahandele okuipaa Josue na Kalebe!

Oityi Jeova alinga? Wapopila Moisesi okuti: ‘Nalingila ovipuka ovinyingi ova Isilayeli, mahi no ngotyo kavetavela kuame. Mokonda yotyo, mavakala moluhandya omanima 40, ngamo vankhila. Ovana vavo kumwe na Josue na Kalebe ovo vala mavanyingila mo tyilongo nalaa okuveavela.’