Ri e israelitas xeʼel bʼi chuwach ri juyubʼ Sinaí. Xebʼe pa ri chaqiʼj Ulew re Parán kʼa xeʼopan pa jun lugar ubʼiʼ Cadés. Chilaʼ ri Jehová xubʼij che ri Moisés: «Cheʼataqaʼ bʼi 12 achijabʼ, jun winaq pa kijujunal ri tribu, rech kkila ri Canaán, ri Ulew ri kinya na chke ri e israelitas». Rumal laʼ Moisés xeʼuchaʼ 12 achijabʼ xuqujeʼ xubʼij chke: «Jix pa Canaán xuqujeʼ chiwilaʼ we ri Ulew utz che tikoʼn. Chiwilaʼ xuqujeʼ we ri winaq kʼo kichuqʼabʼ o kʼo taj, xuqujeʼ ri kachoch are jun kabʼal o e kʼo pa nimaʼq taq tinamit». Ri e 12 Achijabʼ xebʼe pa Canaán. Chkixoʼl e kʼo ri Josué xuqujeʼ Caleb.

Ri e achijabʼ xetzalij loq qʼaxinaq chiʼ 40 qʼij. Xkikʼam lo higos, granadas xuqujeʼ uvas, xuqujeʼ xkibʼij wa taq tzij riʼ: «Canaán are jun utzalaj ulew, are kʼu ri e winaq sibʼalaj kʼo kichuqʼabʼ, xuqujeʼ ri e tinamit sutim rij kumal nimaʼq taq tapya». Tekʼuriʼ ri Caleb xubʼij: «¡Kojkunik kojchʼakanik! Joʼ bʼaʼ». ¿Jasche kachomaj che jeʼ xubʼij wariʼ ri Caleb? Rumal che ri areʼ xuqujeʼ ri Josué kikubʼsam kikʼuʼx chrij ri Jehová. Are kʼu, ri e 10 achijabʼ xkibʼij: «Kojbʼe taj. Ri e winaq che e kʼo jelaʼ sibʼalaj e nimaʼq, e junam kukʼ ri e takʼataq winaq. Ujunamisaxik qibʼ kukʼ, oj xa oj sakʼ chkiwach».

Ri e israelitas xkixeʼj kibʼ, xkimaj wetʼetʼem xkibʼij chibʼil kibʼ: «Chqachaʼ jun ajkʼamal bʼe xuqujeʼ chojtzalij pa Egipto. ¿Jasche kojbʼe pa Canaán? ¿Rech kojkamisaxik?». Josué xuqujeʼ Caleb xkibʼij: «Are utz kqanimaj ri  Jehová. Areʼ kojuchajij. Kixeʼj ta iwibʼ». Are kʼu ri e israelitas xkita taj. Xa neʼ, kkaj kkikamisaj ri Josué xuqujeʼ Caleb.

¿Jas kʼu xubʼan ri Jehová? Xubʼij che ri Moisés: «Nubʼanom kʼi utz taq jastaq chke ri israelitas..., are kʼu kʼa kimik e nimanaq taj. Rumal waʼ kebʼenyaʼ kan pa ri chaqiʼj Ulew 40 junabʼ kʼa kekam kʼu na. Xaq xiw ri e kalkʼwal, xuqujeʼ Josué xuqujeʼ Caleb, kekʼojiʼ na pa ri Ulew che nutzujum che kinya chke ri e israelitas».