Israelitacunaca Sinaí urcumantaca Parán shitashca pambacunata rishpami Cadés llajtaman chayarcacuna. Chaipimi Jehová Diosca Moisestaca, ‘Canaán llajtata rijsimuchun cada aillumanta shuj runata cachai. Chai llajtatami israelcunaman cugrini’ nirca. Moisesca 12 runacunata agllashpaca, ‘allpaca alli granota pꞌucuj cashcata, mana pꞌucuj cashcata. Chaipi causajcunapish sinchi cashcata, mana sinchi cashcata. Carpa huasicunapi o pueblocunapi causaj cashcata ricumugrichij’ nirca. 12 runacunaca Canaanmanmi rircacuna. Paicunapurapica Calebpish Josuepishmi carca.

Ricunaman rijcunaca 40 punllacunapimi tigramurca. Higocunata, granadacunata, uvacunata apashcami shamurcacuna. Chaipimi paicunaca, ‘Canaanca alli allpami can. Shinapish chai llajtapi causajcunaca sinchicunamari. Pueblocunaca jatun pircacunatami charin’ nircacuna. Pero Calebca, ‘¡huichiyashunchij! Paicunataca mishashunmi’ nircami. ¿Imamantashi chashna nirca? Paipish Josuepish Diospimi confiarcacuna. Caishuj 10 runacunaca, ‘ama huichiyashunchijchu. Chai llajtapi causajcunaca jatun runacunamari. Paicunapaj cꞌuchupica saltamontecuna shinallami canchij’ nircacunami.

Israelitacunaca mancharinacushpami paicunapura, ‘shujtaj pushajta agllashpa Egiptoman tigrashunchij. Canaanmanca imapajtaj rishun. Ñucanchijtaca huañuchingamari’ ninacui callarircacuna. Pero Josuepish Calebpish, ‘Diosta cazushunchij. Paimi cuidanga.  Ama manchashunchijchu’ nircacunami. Israelitacunaca mana uyasha nishpami paicunataca huañuchishun nircacuna.

¿Jehová Diosca imatataj rurarca? Moisestaca, ‘israelitacunapajca achca allicunatami rurashcani. Pero paicunaca mana cazusha nincunachu. Chaimantami cai shitashca pambacunapi 40 huatacunata causashpa huañungacuna. Paicunapaj huahuacunallami Josuehuan, Calebhuan israelitacunaman cusha nishca allpapica causangacuna’ nircami.