Israel runakunaqa Sinaí orqomantan Parán ladoman viajaranku, jinan chayaranku Cadesman. Chaypin Jehová Diosqa Moisesta niran: “Sapanka ayllumanta juj runata ajllay, jinaspa paykunata kachay Canaán allpata qhawamunankupaq”, nispa. Jinan Moisesqa 12 runata ajllaspa niran: “Canaanman rispa allinta qhawamunkichis runankuna kallpayoqchus icha manachus kasqankuta, karpakunapichu icha llaqtapichu tiyasqankuta, allpankupas imayna kasqantawan”, nispa. Jinan 12 runakuna Canaán allpata qhawaq riranku, chaypin Josuepas Calebpas kasharanku.

Qhawaqkunaqa 40 p’unchaymantan kutimuranku. Apamurankun higosta, granadakunata, uvasta ima. Nirankutaq: “Canaanqa sumaq allpan kasqa, chaypi tiyaq runakunan ichaqa kallpayoq kanku, llaqtankuq perqankunapas jatunkaraymi kasqa”, nispa. Calebmi ichaqa niran: “¡Paykunataqa atipasunmi! ¡Jakuchis!”, nispa. ¿Imaraykun chayta niran? Paypas Josuepas Diospin confiaranku. Chunka runakunataq niranku: “¡Manan risunmanchu! ¡Chay runakunaqa jatunkaraymi kanku! ¡Paykunaq ladonpiqa t’isku-t’isku otaq ch’illiku jinan kanchis!”, nispa.

Jinan Israel runakunaqa quejakuspa niranku: “Waj kamachiqta ajllakuspa Egiptoman kutipusun. Yanqapaqmi Canaanmanqa  risunman, chaypiqa wañusunmi”, nispa. Josuewan Calebwantaq niranku: “Diosta kasukusun, ama manchakuychischu, pakaykuwasunmi”, nispa. Ichaqa manan kasukurankuchu, aswanmi Josueta Calebtawan wañuchiyta munaranku.

¿Imatan Jehová Dios ruwaran? Moisestan niran: “Imaymanataña Israel runakunapaq ruwarani chaypas, manan kasuwankuchu. 40 watan ch’inneqpi purinqaku wañunankukama. Wawankun ichaqa Josuepiwan Calebpiwan prometesqay allpaman jaykunqaku”, nispa.