Sinaí urcumanda israelitacuna llujshishpaca, Parán shuti jichushca pambata yalishpami Cadés nishca pushtuman chayarca. Chaipimi Jehová Diosca Moisesmanga nirca, ‘Canaán llactata rijsichun, canhuan tianajuj runacunata cachai. Chai llactatami israelitacunaman caragrini, paicunataca cada aillumanda shuj mandajta [12 jaricunata] cachai’ nishpa. Chaimi Moisesca 12 jaricunata agllashpa nirca, Canaán alpacunapi granocuna fucujta na fucujtapash ricugrichi. Shinallata chaipi causanajun gentecuna shinlli o na shinlli cajta, huasicunapi o carpa huasicunapi causanajujtapash ricugrichi nishpa. Chaimi paicunaca Canaán llactaman rirca. Josuepash, Calebpashmi paicunapurapica rinajurca.

Canaán llactata chapangapaj rishca jaricunaca 40 punllacuna jipami jigoscunata, granadillacunata, uvascunatapash apashpa tigramurca. Shinallata paicunaca nircami: Canaán llacta alipacha alpa cajpipash ‘ninan shinlli runacunami causan. Pueblocunapash jatun pircahuan jarcashcami can’ nishpa. Shinapash Calebca nircami: ‘Ucha vichai rishunchi’, paicunataca mishai ushashunmi nishpa. Calebca ¿imamandashi shina nirca? Josuepash, Calebpash Jehovapi confiashcamandami shina nirca. Cutin chaishuj 10 jaricunaca cashnami ninajurca: ‘Ama vichai rishunchichu chai llactapi gentecunaca manllanai jatun, shinllicunami can. Paicunahuan ricujpica ñucanchica langosta juru shinami canchi’ nishpa.

Chaita uyashpami israelitacunaca desanimarishpa caishuj, chaishuj cashna ninajurca: “Cunanga, ñucanchi puramanda shuj mandajta churashpa, Egiptoman tigrashunchi”. Canaán llactaman rishpaca huañuchi tucushunmi nishpa. Chaimi Josuepash Calebpash cashna nirca: Jehovatami cazuna canchi. Paimi ñucanchitaca  ayudanga. “Paicunataca, napacha manllanachu canguichi” nishpa. Shina nijpipash israelitacunaca na cazushpami Josueta, Calebtaca huañuchingapaj munarca.

Chaita ricushpami Jehová Diosca Moisesmanga nirca, paicunamanda imatalla rurashcatapash cungashpami israelitacunaca ñucata na cazushpa causanajun. Chaimandami paicunataca 40 huatacunata cai jichushca pambapi huañungacaman saquisha. Israelitacunaman cusha nishca alpapica paicunapa churicuna, Josué, Calebllami chaipica causanajunga.