O Izraelcija dželje andi planina Sinaj hem prekali pustinja Faran, reslje dži ko jekh than kova vičindža pe Kadis. Odothe o Jehova phendža e Mojsijese: „Bičhal 12 manušen, po jekh ando svako pleme, te ispitinen i phuv Hanan, odija phuv ka dav e Izraelcendže.“ Odola manuša hine pendžarde sar „uhodija“. O Mojsije birindža 12 manuša hem phendža ljendže: „Džan ko Hanan hem dikhen da li ki odija phuv šaj te barjol hrana. Dikhen da li tane o manuša zoralje ja slaba hem da li živinena ko šatorija ja ko dizja.“ Tegani o 12 manuša, maškaro kola hine o Isus Navin hem o Halev, dželje ko Hanan.

Palo 40 dive o uhodija irindže pe hem andže smokve, nar hem drakha. On vačerdže: „I phuv tani but šukar, ama o manuša tane zoralje hem živinena ko dizja kola isi ljen uče zidija.“ Ama, o Halev phendža: „Šaj te pobedina ljen. Ma te adžičera, hajde te dža odmah!“ Da li džaneja sose o Halev phendža akava? Odoljese so ov hem o Isus Navin hine ljen poverenje ko Jehova. Ama, avera deš manuša phendže: „Na! O manuša uduri tane bare sar divija! Amen hijam ljendže sar skakavcija.“

Akava but obeshrabrindža e Izraelcen. On počmindže te žalinen pe hem jekh jekhese te phenen: „Hajde te birina amendže aver vođa hem te irina amen ko Egipat. Sose te dža ko odova than hem te  mera uduri?“ O Isus Navin hem o Halev phendže: „Šunen e Jehova hem ma daran. Ov ka zaštitini amen.“ Ama, o Izraelcija na manglje te šunen oljen. On čak manglje te mudaren e Isuse Navine hem e Haleve!

So čerdža o Jehova? Ov phendža e Mojsijese: „Palo sa odova so čerdžum e Izraelcendže, on paljem na šunena man. Odoljese ka ačhon ki pustinja 40 berš hem uduri ka meren. Samo oljenge čhave, o Isus Navin hem o Halev ka živinen ki phuv so obećindžum so ka dav ljendže.“